मुंबई, 06 नोव्हेंबर (हिं.स.)। 'राईज अँड फॉल' या रिॲलिटी शोचा दुसरा सीझन नुकताच संपन्न झाला आहे. शहजाद पूनावाला या शोचा विजेता ठरला असून, त्याने ट्रॉफीसह ३५ लाख रुपयांचे रोख बक्षीस जिंकले आहे. प्रियांका चहर चौधरी या स्पर्धेत प्रथम उपविजेती (फर्स्ट रनर-अप) ठरली, तर गौतम गुलाटी द्वितीय उपविजेता (सेकंड रनर-अप) ठरला. विजयानंतर शहजादने जाहीर केले की, तो बक्षीस रकमेतील संपूर्ण रक्कम बिहार आणि आसाममधील पूरग्रस्तांच्या मदतीसाठी दान करणार आहे.

आपल्या विजयाबद्दल आनंद व्यक्त करताना शहजाद म्हणाला की, या शोमधील प्रवास अजिबात सोपा नव्हता. संपूर्ण प्रक्रियेदरम्यान त्याला सतत बदलत्या परिस्थितीनुसार जुळवून घ्यावे लागले आणि अनेक आव्हानांचा सामना करावा लागला. काही प्रसंगी त्याला स्वतःच्या क्षमतेवर शंकाही आली, परंतु तरीही तो विजयाबाबत आत्मविश्वासी होता आणि जेव्हा त्याच्या हातात ट्रॉफी आली, तेव्हा त्याचा हा आत्मविश्वास सार्थ ठरला. शोदरम्यान घेतलेले निर्णय आणि निर्माण केलेले नातेसंबंध याबद्दल त्याला अभिमान वाटतो.

शहजादने शोचे निर्माते, एमएक्स प्लेयर (MX Player) आणि बनिजे आशिया (Banijay Asia) यांचे आभार मानले. त्याने नमूद केले की, या प्लॅटफॉर्ममुळे त्याला आपली प्रतिभा दाखवण्याची संधी मिळाली. तो केवळ ट्रॉफीच नव्हे, तर अनेक अविस्मरणीय आठवणीही सोबत घेऊन जात आहे. त्याच्या मते, शोदरम्यान निर्माण झालेली मैत्री, एकत्र घालवलेले आनंदाचे क्षण आणि समोर आलेली आव्हाने ही बक्षीस रकमेपेक्षाही अधिक मौल्यवान आहेत.

---------------

हिंदुस्थान समाचार / हर्षदा गावकर