नवी दिल्ली, 07 नोव्हेंबर (हिं.स.)। दिवाळीच्या निमित्ताने बॉम्बे स्टॉक एक्स्चेंज (बीएसई) आणि नॅशनल स्टॉक एक्स्चेंज (एनएसई) येथे यंदा उद्या दुपारी २.२० ते ३.३० वाजेपर्यंत मुहूर्त ट्रेडिंग होणार आहे. दरवर्षी दिवाळीच्या दिवशी पारंपरिक पद्धतीने होणाऱ्या या एक तासाच्या विशेष व्यवहार सत्राची वेळ काही दिवसांपूर्वीच एनएसई आणि बीएसईकडून अधिकृतपणे जाहीर करण्यात आली होती.

यंदा दिवाळी रविवारी आली आहे. रविवार हा साप्ताहिक सुट्टीचा दिवस असल्याने शेअर बाजारातील नियमित व्यवहार बंद असतात. मात्र, दिवाळीच्या निमित्ताने नव्या आर्थिक गुंतवणुकीची सुरुवात करण्यासाठी आणि लक्ष्मी नववर्षाचे स्वागत करण्यासाठी दरवर्षीप्रमाणे यंदाही मुहूर्त ट्रेडिंगसाठी बाजार विशेष स्वरूपात सुरू ठेवण्यात येणार आहेत. भारतीय संस्कृती आणि व्यापार जगतात मुहूर्त ट्रेडिंगच्या या एक तासाच्या सत्राला अत्यंत पवित्र आणि समृद्धी आणणारे मानले जाते. या वेळी व्यापारी आणि सामान्य गुंतवणूकदार नव्या व्यवहारांची सुरुवात करण्यासोबतच लक्ष्मीमाता आणि भगवान गणेशाची विशेष पूजाअर्चाही करतात.

या विशेष व्यवहार सत्राच्या वेळेबाबत सांगायचे झाल्यास, उद्या मुख्य मुहूर्त ट्रेडिंग दुपारी २.२० वाजता सुरू होईल आणि ३.३० वाजता संपेल. मात्र, मुख्य व्यवहार सुरू होण्यापूर्वीच बाजारातील हालचालींना सुरुवात होणार आहे. दुपारी १.५० ते २.०५ या वेळेत ब्लॉक डीलसाठी वेळ निश्चित करण्यात आली आहे. त्यानंतर २.०५ ते २.२० या कालावधीत प्री-ओपनिंग सत्र आयोजित केले जाईल.

मुख्य सत्र संपल्यानंतर बाजारातील व्यवहार सुरळीतपणे पूर्ण करण्यासाठी वेगवेगळी क्लोजिंग सत्रे ठेवण्यात आली आहेत. यामध्ये नॉन-सीएएस क्लोजिंग दुपारी ३.३० ते ३.५० या वेळेत, तर सीएएस क्लोजिंग दुपारी ३.३५ ते ३.५० या वेळेत होईल. त्यानंतर दुपारी ३.५० ते ४ वाजेपर्यंत पोस्ट-क्लोजिंग सत्र चालेल. हे सत्र संपल्यानंतर दिवाळीच्या या विशेष व्यवहार सत्राची सांगता होईल.

सणासुदीच्या या संपूर्ण आठवड्यातील बाजाराच्या सुट्ट्यांचे वेळापत्रक पाहिल्यास, रविवारी केवळ मुहूर्त ट्रेडिंग होणार आहे. दिवाळीनंतर लगेचच सोमवार, ९ नोव्हेंबरपासून शेअर बाजारातील नियमित व्यवहार नेहमीप्रमाणे सुरू होतील. मात्र, त्यानंतर दुसऱ्याच दिवशी म्हणजेच मंगळवार, १० नोव्हेंबर रोजी दिवाळी-बलिप्रतिपदेच्या सणानिमित्त एनएसई आणि बीएसई या दोन्ही बाजारांना सुट्टी असेल. नोव्हेंबर महिन्यातील इतर सुट्ट्यांबाबत सांगायचे झाल्यास, २४ नोव्हेंबर रोजी मंगळवारी गुरुनानक जयंती (प्रकाश गुरुपर्व) निमित्तही शेअर बाजारातील व्यवहार बंद राहतील.

दिवाळीनिमित्त होणाऱ्या या विशेष मुहूर्त ट्रेडिंगसाठी सर्वाधिक दिलासादायक बाब म्हणजे देशांतर्गत शेअर बाजारातील दीर्घकाळापासून सुरू असलेली मंदी आता संपुष्टात येताना दिसत आहे. जागतिक स्तरावर अमेरिकेतील मध्यावधी निवडणुकांच्या निकालानंतर आंतरराष्ट्रीय बाजारात कच्च्या तेलाच्या किमतीत मोठी घसरण झाली आहे. त्याचा तात्काळ परिणाम भारतीय शेअर बाजारावर झाला असून, बाजाराला नवसंजीवनी मिळाली आहे.

आंतरराष्ट्रीय बाजारात कच्च्या तेलाचे दर कमी झाल्यामुळे देशांतर्गत बाजारात सर्वच क्षेत्रांत पुन्हा मोठ्या प्रमाणात खरेदी सुरू झाली आहे. याच जोरावर दिवाळीच्या अगोदर बाजाराने सलग दमदार तेजी नोंदवली आहे. या जोरदार तेजीमुळे सेन्सेक्सने अवघ्या एका आठवड्यात ६,५९८.४९ अंकांची म्हणजेच ८.८२ टक्क्यांची मोठी वाढ नोंदवत ८१,०२८.०२ अंकांची पातळी गाठली. त्याचप्रमाणे निफ्टीनेही साप्ताहिक आधारावर १,९७७.२५ अंकांची म्हणजेच ८.५८ टक्क्यांची जोरदार झेप घेत २५,०३०.३५ अंकांची पातळी गाठली आहे. शेअर बाजारातील या तेजीमुळे गुंतवणूकदारांच्या चेहऱ्यावर आनंदाचे वातावरण निर्माण झाले असून, यंदाच्या मुहूर्त ट्रेडिंगमध्ये मोठ्या प्रमाणात गुंतवणूक होण्याची अपेक्षा व्यक्त केली जात आहे.

---------------

हिंदुस्थान समाचार / Suraj Chaugule