मुंबई, 18 फेब्रुवारी, (हिं.स.)। इनफिनिक्सने भारतीय बाजारात आपला नवीन मिड-रेंज स्मार्टफोनइन्फिनिक्स नोट एज 5G लॉन्च केला आहे. आकर्षक डिझाइन आणि दमदार स्पेसिफिकेशन्समुळे हा फोन ग्राहकांचे लक्ष वेधून घेत आहे. या फोनमध्ये 6.78 इंचाची 1.5K (1208x2644 पिक्सेल) रिझोल्यूशन असलेली LTPS 3D कर्व्ह्ड AMOLED डिस्प्ले देण्यात आली आहे. 120Hz रिफ्रेश रेट, 240Hz टच सॅम्पलिंग रेट आणि तब्बल 4,500 निट्स पीक ब्राइटनेस यामुळे स्क्रीन अधिक स्मूथ आणि उजळ अनुभव देते. कॉर्निंग गोरिल्ला ग्लास 7i प्रोटेक्शनमुळे स्क्रीनची सुरक्षितताही वाढवण्यात आली आहे.

परफॉर्मन्ससाठी या फोनमध्ये मीडियाटेक डायमेन्सिटी 7100 प्रोसेसर देण्यात आला असून तो Mali-G610 GPU सह येतो. 8GB पर्यंत LPDDR5X रॅम आणि 256GB पर्यंत UFS 2.2 स्टोरेजचा पर्याय उपलब्ध आहे. त्यामुळे मल्टिटास्किंग आणि गेमिंगचा अनुभव अधिक वेगवान होतो. कॅमेऱ्याबाबत बोलायचे झाल्यास, फोनच्या मागील बाजूस 50MP मुख्य कॅमेरा f/1.8 अपर्चरसह आणि ड्युअल फ्लॅश सेटअपसह देण्यात आला आहे. सेल्फी आणि व्हिडिओ कॉलसाठी 13MP फ्रंट कॅमेरा उपलब्ध आहे.

या फोनमध्ये 6500mAh क्षमतेची मोठी बॅटरी देण्यात आली असून ती 45W फास्ट चार्जिंग आणि 10W रिव्हर्स वायर्ड चार्जिंगला सपोर्ट करते. IP65 रेटिंगमुळे पाणी आणि धुळीपासून संरक्षण मिळते. ड्युअल सिम, 5G, Wi-Fi, Bluetooth 5.4, NFC आणि USB Type-C यांसारखे कनेक्टिव्हिटी पर्यायही उपलब्ध आहेत.

या फोनची किंमत 21,999 रुपयांपासून सुरू होते. 25 फेब्रुवारीपासून इनफिनिक्स इंडिया ऑनलाइन स्टोअर आणि फ्लिपकार्टवर विक्री सुरू होणार आहे. SBI आणि ICICI बँक कार्डधारकांना 2,000 रुपयांपर्यंत सवलत दिली जाणार असून सहा महिन्यांचे वन-टाइम स्क्रीन रिप्लेसमेंट आणि एक्सटेंडेड वॉरंटीची सुविधाही देण्यात आली आहे.

---------------

हिंदुस्थान समाचार / Suraj Chaugule