नवी दिल्ली , 03 फेब्रुवारी (हिं.स.)।सायप्रसचे राष्ट्राध्यक्ष निकोस क्रिस्टोडौलाइड्स हे मे महिन्याच्या अखेरीस भारताच्या अधिकृत दौऱ्यावर येणार आहेत. भारतातील सायप्रसचे उच्चायुक्त इवागोरस व्ह्रायोनिड्स यांनी सांगितले की हा दौरा दोन्ही देशांमधील वाढत्या द्विपक्षीय संबंधांना आणखी बळकटी देणारा ठरेल.
युरोपियन युनियन परिषदेचे अध्यक्षपद सायप्रसकडून स्वीकारण्याच्या पार्श्वभूमीवर माध्यमांशी बोलताना व्ह्रायोनिड्स यांनी सांगितले की उच्चस्तरीय बैठकींची मालिका दोन्ही देशांमधील अधिक दृढ होत असलेल्या भागीदारीचे द्योतक आहे. त्यांनी जाहीर केले की सायप्रसचे परराष्ट्र मंत्री पुढील महिन्यात भारत दौऱ्यावर येणार असून, त्यानंतर मे महिन्यात राष्ट्राध्यक्ष क्रिस्टोडौलाइड्स यांचा दौरा होईल.
उच्चायुक्तांनी सांगितले,“सध्या अनेक घडामोडी घडत आहेत. विविध द्विपक्षीय दौरे सुरू असून, यामुळे सायप्रस आणि भारत यांच्यातील मजबूत बांधिलकी आणि राजकीय सहभाग स्पष्टपणे दिसून येतो.”
दरम्यान, पंतप्रधान नरेंद्र मोदी यांनी मागील वर्षी जून महिन्यात केलेल्या सायप्रस दौऱ्याचा उल्लेख करताना व्ह्रायोनिड्स यांनी सांगितले की या दौऱ्यादरम्यान संयुक्त कार्ययोजनेवर स्वाक्षरी करण्यात आली होती. या कार्ययोजनेत पुढील पाच वर्षांसाठी सहकार्याच्या प्रमुख क्षेत्रांची ओळख करून देण्यात आली आहे.“या क्षेत्रांमध्ये पर्यटन, वाणिज्य, शिक्षण, डेस्टिनेशन वेडिंग, चित्रपट उद्योग आणि संरक्षण यांचा समावेश आहे,” असे त्यांनी स्पष्ट केले.
सायप्रस २०२६ च्या पहिल्या सहा महिन्यांसाठी युरोपियन युनियन परिषदेचे अध्यक्षपद भूषवणार आहे. व्ह्रायोनिड्स यांनी सांगितले,“आमचा मुख्य विषय स्वायत्तता आहे– संरक्षणातील स्वायत्तता, व्यापारातील स्वायत्तता आणि सामाजिक विषयांतील स्वायत्तता. सायप्रस या सर्व प्राधान्यांना पुढे नेण्यासाठी सक्रियपणे कार्य करेल.” यासोबतच त्यांनी भारत–मध्य पूर्व–युरोप आर्थिक कॉरिडॉर (IMEC) च्या धोरणात्मक महत्त्वावरही भर दिला. भारत आणि युरोप यांच्यातील संपर्क वाढवण्यासाठी ही ‘सर्वात आशादायक भू-राजकीय पुढाकारांपैकी एक’ असल्याचे त्यांनी वर्णन केले.
व्ह्रायोनिड्स यांनी सांगितले की सायप्रस भूमध्यसागरीय प्रदेशासह गाझा, युक्रेन, व्हेनेझुएला, ग्रीनलँड तसेच जगातील इतर भागांतील घडामोडींवर बारकाईने लक्ष ठेवून आहे.“आपल्या परिसरात तसेच त्यापलीकडे घडणाऱ्या घटनांमधून एक नवी जागतिक व्यवस्था आकार घेत असताना, आम्ही अशा घडामोडींच्या प्रभावाखाली येत आहोत ज्या जागतिक घडामोडींविषयी गंभीर चिंता निर्माण करतात,” असेही त्यांनी नमूद केले.
---------------
हिंदुस्थान समाचार / Priyanka Bansode
