नवी दिल्ली, 08 फेब्रुवारी (हिं.स.)तेजस्विन शंकरने पुरुषांच्या हेप्टॅथलॉन स्पर्धेत सुवर्णपदक जिंकून भारताला एकमेव सुवर्णपदक मिळवून दिले. रविवारी तियानजिन येथे झालेल्या आशियाई इनडोअर ॲथलेटिक्स चॅम्पियनशिपमध्ये भारताने पाच पदकांसह आपल्या मोहिमेचा समारोप केला.पदकतालिकेत भारताने एकूण सहावे स्थान पटकावले. चीनने ३४ पदकांसह (१० सुवर्ण, ११ रौप्य आणि १३ कांस्य) अव्वल स्थान मिळवले.

हेप्टॅथलॉनमध्ये सुवर्णपदक जिंकण्याच्या प्रवासात, शंकरने ५९९३ गुण मिळवून, २०११ मध्ये अमेरिकेत नोंदवलेला आपलाच ५६५० गुणांचा राष्ट्रीय इनडोअर विक्रम मोडला. तर पूजा (उंच उडीत रौप्य), तेजिंदरपाल सिंग तूर (गोळाफेकमध्ये रौप्य) आणि अँसी सोजन (लांब उडीत कांस्य) हे रविवारी पदक जिंकणारे इतर खेळाडू होते.शुक्रवारी स्पर्धेच्या पहिल्या दिवशी, भारताचा उंच उडीपटू आदर्श राम ज्योती शंकरने कांस्यपदक जिंकले होते.

पहिल्या दिवसानंतर आघाडीवर असलेल्या शंकरने रविवारी पुढील तीन स्पर्धांमध्ये—६० मीटर अडथळा शर्यत, पोल व्हॉल्ट आणि १००० मीटरमध्ये आपला चांगला फॉर्म कायम ठेवला.६० मीटर अडथळा शर्यतीत, शंकरने ८.०२ सेकंदांची वेळ नोंदवून ९७७ गुण मिळवले. दोन स्पर्धा बाकी असताना, हा भारतीय खेळाडू आपल्या जवळच्या प्रतिस्पर्ध्यापेक्षा जवळपास ४८५ गुणांनी पुढे होता.

पोल व्हॉल्टमध्ये शंकर ४.२० मीटर उंचीसह चौथ्या स्थानावर होता. त्याने ६७३ गुण मिळवून आपली एकूण धावसंख्या ५१६३ गुणांपर्यंत वाढवली. दिवसाच्या शेवटच्या स्पर्धेत, १००० मीटर शर्यतीत, शंकरने २:४३.९१ वेळेसह (८३० गुण) दुसरे स्थान पटकावले आणि आपली एकूण धावसंख्या ५९९३ गुणांपर्यंत नेली.

शंकरच्या नावावर गेल्या वर्षी पोलंडमध्ये नोंदवलेला ७८२६ गुणांचा राष्ट्रीय डेकॅथलॉन (मैदानी) विक्रम आहे. त्याने चीनमध्ये झालेल्या २०२३ च्या आशियाई क्रीडा स्पर्धेत डेकॅथलॉनमध्ये रौप्यपदकही जिंकले होते.

पुरुषांच्या गोळाफेकमध्ये, तूरने हंगामातील सर्वोत्तम २०.०५ मीटर फेक करून रौप्यपदक पटकावले. तूरचे इतर वैध थ्रो १९.४९ मीटर आणि १९.८५ मीटर होते. त्याचे शेवटचे दोन प्रयत्न अवैध ठरले. चीनच्या चेंग्यू चेनने २०.०७ मीटरच्या थ्रोसह सुवर्णपदक जिंकले. या स्पर्धेतील दुसरा भारतीय खेळाडू समरदीप सिंग गिल १८.९७ मीटरच्या थ्रोसह पाचव्या स्थानावर राहिला.महिलांच्या उंच उडीमध्ये पूजाने १.८७ मीटर उंचीसह रौप्यपदक पटकावले.अन्सीने लांब उडीमध्ये कांस्यपदकाची भर घातली. रविवारी तिची सर्वोत्तम उडी ६.२१ मीटर होती. तिच्या इतर दोन वैध उड्या ६.०२ मीटर आणि ६.२० मीटर होत्या. मौमिता मंडल महिलांच्या लांब उडीमध्ये ६.०१ मीटर अंतरासह सहाव्या स्थानावर राहिली. उदयोन्मुख लांब उडीपटू शाहनवाज खान चौथ्या स्थानावर राहिल्याने त्याला पदकाने हुलकावणी दिली.

---------------

हिंदुस्थान समाचार / वृषाली देशपांडे