इस्लामाबाद , 10 मार्च (हिं.स.)।पाकिस्तानचे पंतप्रधान शहबाज शरीफ यांनी सोमवारी वाढत्या तेलाच्या किमती लक्षात घेता खर्चात कपात करण्याच्या योजनेची घोषणा केली आहे. या अंतर्गत सरकारी कार्यालये आठवड्यातून फक्त चार दिवस उघडतील आणि अर्धे कर्मचारी घरून काम करतील (वर्क फ्रॉम होम). या आठवड्याच्या अखेरीस शाळा दोन आठवड्यांसाठी बंद राहतील.

पाकिस्तानी वृत्तवाहिनीच्या माहितीनुसार, मंत्री आणि सल्लागारांचे परदेश दौरे थांबवण्यात आले आहेत. मंत्री दोन महिने वेतन घेणार नाहीत आणि खासदारांच्या पगारात २५% कपात होईल.तसेच, पाकिस्तानात आता दोन महिने सरकारी गाड्यांना ५०% कमी इंधन मिळेल. ६०% सरकारी वाहने चालणार नाहीत. सर्व सरकारी विभाग त्यांच्या खर्चात २०% कपात करतील.शरीफ म्हणाले की, अमेरिका-इस्रायल-इराण संघर्षामुळे कच्च्या तेलाची किंमत ६० डॉलरवरून १०० डॉलर प्रति बॅरलपेक्षा जास्त झाली आहे. यामुळे हे निर्णय घेण्यात आले आहेत.

पाकिस्तानने पेट्रोल आणि डिझेलच्या किमतीत सुमारे 20% वाढ केली आहे. पेट्रोल आणि डिझेलच्या किमतीत प्रति लिटर 55 रुपये (पाकिस्तानी रुपया) पर्यंत वाढ करण्यात आली आहे. या वाढीनंतर पाकिस्तानात पेट्रोलची किंमत आता प्रति लिटर 335.86 रुपये झाली आहे. तर डिझेल 321.17 रुपये प्रति लिटरच्या पातळीवर पोहोचले आहे.

किमती वाढल्याची बातमी येताच पाकिस्तानमधील लाहोर आणि कराचीसारख्या मोठ्या शहरांमधील पेट्रोल पंपांवर मोठी गर्दी जमली. लोक तासन्तास आपल्या पाळीची वाट पाहताना दिसले. लोकांना भीती आहे की येत्या काही दिवसांत तेलाची टंचाई निर्माण होऊ शकते.

---------------

हिंदुस्थान समाचार / Priyanka Bansode