रायगड, 12 मार्च (हिं.स.) : सोशल मीडियावर सध्या एका गॅस वितरण करणाऱ्या कामगाराचा फोटो मोठ्या प्रमाणात व्हायरल होत आहे. पावसाने भिजलेल्या रस्त्यावर सायकल ढकलत जाणारा हा कामगार सायकलवर लाकडांचा मोठा गठ्ठा घेऊन जाताना दिसतो. त्याच्या शर्टवर ‘भारत गॅस’ असा उल्लेख असल्याने हा गॅस वितरणाशी संबंधित कर्मचारी असावा, असा अंदाज व्यक्त केला जात आहे.

सध्या युद्धजन्य परिस्थितीमुळे जगभरात इंधन आणि गॅसच्या किमती गगनाला भिडत आहेत. त्याचा परिणाम सर्वसामान्यांवर होत असताना हा फोटो पाहून अनेकांनी भावनिक प्रतिक्रिया दिल्या आहेत. घराघरात गॅस सिलिंडर पोहोचवणारा माणूस स्वतःच्या घरासाठी मात्र लाकूड आणत आहे का, असा प्रश्न अनेकांच्या मनात निर्माण झाला आहे. मात्र, हा फोटो नेमका कुठला आहे किंवा त्या व्यक्तीची खरी परिस्थिती काय आहे, याची अधिकृत माहिती उपलब्ध नाही. तरीही हा फोटो समाजातील कष्टकरी वर्गाच्या संघर्षाचे प्रतीक म्हणून मोठ्या प्रमाणात शेअर केला जात आहे. कधी कधी एक साधा फोटोही समाजातील वास्तवावर प्रकाश टाकतो; हा व्हायरल फोटो तसाच आहे—जो आपल्याला कष्टकरी माणसाच्या आयुष्याबद्दल विचार करायला भाग पाडतो.

----------------

हिंदुस्थान समाचार / संदेश साळुंके (रायगड)