* प्रशासनाचे लक्ष विचलित करण्याचा विकृत प्रयत्न; सुरक्षा यंत्रणा सतर्क !
मुंबई, 12 मार्च (हिं.स.) - विधानभवनासह मुंबईतील ४ महत्त्वाच्या ठिकाणांना बॉम्बने उडवून देण्याची धमकी एका निनावी ई-मेलद्वारे गुरुवारी सकाळी देण्यात आली. यामुळे परिसरात काही काळ तणावाचे वातावरण असले, तरी प्राथमिक अन्वेषणात हा ‘हॉक्स’ (खोटी धमकी) ई-मेल असल्याचे समोर आले आहे. राज्याचे गृहराज्यमंत्री योगेश कदम आणि गृहराज्यमंत्री पंकज भोयर यांनी परिस्थिती स्पष्ट करत जनतेला घाबरून न जाण्याचे आवाहन केले आहे.
गुरुवारी सकाळी ६ वाजून ५७ मिनिटांनी हा धमकीचा ई-मेल प्राप्त झाला होता. यामध्ये स्फोट घडवून आणण्याची वेळही देण्यात आली होती. यामध्ये मिसाईल आक्रमणाचाही उल्लेख होता. या घटनेची माहिती मिळताच पोलीस दल आणि ‘बॉम्ब शोधक आणि नाशक पथक’ (BDDS) यांनी तातडीने शोध मोहीम राबवली. धमकी मिळताच मुंबई पोलिसांनी संपूर्ण दक्षिण मुंबईत आणि विशेषतः विधानभवन परिसरात शोध मोहीम राबवली. विधानभवनाच्या सर्व प्रवेशद्वारांवर कडेकोट पोलीस बंदोबस्त तैनात करण्यात आला असून प्रत्येक येणार्या-जाणार्या व्यक्तीची कसून पडताळणी केली जात आहे.
या संदर्भात गृहराज्यमंत्री योगेश कदम म्हणाले की, विधीमंडळ उडवून देण्याची धमकी मिळणे ही वस्तुस्थिती आहे; परंतु हा प्रशासनाचे लक्ष विचलित करण्याचा एक खोटा प्रयत्न आहे. भारताचे जागतिक स्तरावरील वाढते वलय पहाता मिसाईल आक्रमणाची शक्यता अत्यंत अल्प आहे. कोणत्याही राजकीय घटनेशी किंवा आखाती देशांतील युद्धाशी याचा संबंध जोडणे चुकीचे ठरेल. विधानभवन पूर्णपणे सुरक्षित आहे.
गृहराज्यमंत्री पंकज भोयर म्हणाले की, देशात आणि राज्यात शांतता असतांना काही विकृत व्यक्ती वातावरण बिघडवण्याचा प्रयत्न करत आहेत; मात्र गृहविभागाच्या तत्परतेमुळे हे कारस्थान हाणून पाडण्यात आले आहे. विधानभवनाच्या सर्व प्रवेशद्वारांवर कडेकोट पोलीस बंदोबस्त तैनात करण्यात आला असून प्रत्येक व्यक्तीची कसून पडताळणी केली जात आहे. हा ई-मेल कोठून आला, याचा शोध सायबर सेल आणि पोलीस यंत्रणा घेत आहेत.
---------------
हिंदुस्थान समाचार / सुधांशू जोशी
