नवी दिल्ली , 15 मार्च (हिं.स.)।मध्य पूर्वेमधील वाढत्या तणावाच्या पार्श्वभूमीवर रविवारी एअर इंडिया आणि एअर इंडिया एक्सप्रेस या विमान कंपन्या या प्रदेशातून ये-जा करणाऱ्या एकूण ७२ नियोजित आणि अनियोजित उड्डाणांचे संचालन करणार आहेत.

दोन्ही विमान कंपन्या १५ मार्च रोजी जेद्दा आणि मस्कटसाठी त्यांच्या नियोजित सेवा सुरू ठेवणार आहेत. भारत आणि जेद्दा दरम्यान एकूण ८ उड्डाणांचा समावेश आहे. विमान कंपनीने दिलेल्या माहितीनुसार, एअर इंडिया दिल्ली आणि मुंबई येथून प्रत्येकी एक परतीची सेवा चालवेल, तर एअर इंडिया एक्सप्रेस बेंगळुरू आणि कोझिकोड येथून प्रत्येकी एक उड्डाण संचालित करेल.

एअर इंडिया एक्सप्रेस मस्कटसाठी आणि तेथून एकूण १२ नियोजित उड्डाणेही चालवणार आहे. यात दिल्ली, कोची, कोझिकोड, मंगळुरू, मुंबई आणि तिरुवनंतपुरम येथील सेवांचा समावेश असेल. याशिवाय, एअर इंडिया आणि एअर इंडिया एक्सप्रेस संयुक्त अरब अमिरात (यूएई) आणि सौदी अरेबियासाठी तसेच तेथून एकूण ५२ अनियोजित उड्डाणे संचालित करतील. ही उड्डाणे प्रस्थान स्थानकांवरील स्लॉटची उपलब्धता आणि त्या वेळच्या परिस्थितीनुसार चालवली जाणार आहेत.

विमान कंपनीच्या माहितीनुसार, ही सर्व उड्डाणे संबंधित भारतीय आणि स्थानिक नियामक प्राधिकरणांच्या आवश्यक परवानग्यांसह चालवली जात आहेत. तसेच, एअर इंडिया समूह पश्चिम आशियातील गंतव्यस्थानांसाठी आणि तेथून अतिरिक्त अॅड-हॉक उड्डाणे सुरू करण्याच्या प्रत्येक संधीचा शोध घेत असल्याचेही सांगण्यात आले आहे.

दरम्यान, एअर इंडिया आणि इंडिगो नंतर अकासा एअरनेही आपल्या उड्डाणांवर इंधन अधिभार (फ्यूल सरचार्ज) लागू केला आहे. मध्य पूर्वेमधील बदलत्या भू-राजकीय परिस्थितीमुळे एव्हिएशन टर्बाइन फ्यूल (एटीएफ)च्या किंमती वाढल्याने हा निर्णय घेण्यात आला आहे.

---------------

हिंदुस्थान समाचार / Priyanka Bansode