- पश्चिम बंगालमध्ये २३ आणि २९ एप्रिल रोजी मतदान- आसाम-केरळ-पुद्दुचेरीमध्ये ९ एप्रिल, तामिळनाडूमध्ये २३ एप्रिल रोजी एकाच टप्प्यात मतदान- महाराष्ट्रातील दोन रिक्त जागांसाठीही पोटनिवडणूक २३ एप्रिलला - ४ मे रोजी निकाल

नवी दिल्ली, 15 मार्च (हिं.स.)निवडणूक आयोगाने पश्चिम बंगालसह पाच राज्यांच्या निवडणुकीच्या तारखा जाहीर केल्या आहेत. केवळ पश्चिम बंगालमध्ये दोन टप्प्यात मतदान होणार आहे. मुख्य निवडणूक आयुक्त ज्ञानेश कुमार यांनी सांगितले की, पश्चिम बंगाल विधानसभेसाठी २३ आणि २९ एप्रिल रोजी दोन टप्प्यात मतदान होईल. २३४ सदस्यांच्या तामिळनाडू विधानसभेसाठी २३ एप्रिल रोजी मतदान होईल. केरळ, आसाम आणि पुद्दुचेरीसाठी ९ एप्रिल रोजी एकाच टप्प्यात मतदान होईल. त्यांनी सांगितले की, चार राज्ये आणि केंद्रशासित प्रदेशासाठी मतमोजणी ४ मे रोजी होईल.

आसाम, पश्चिम बंगाल, केरळ, तामिळनाडू आणि पुद्दुचेरी केंद्रशासित प्रदेशातील विधानसभा निवडणुकांसोबतच इतर अनेक विधानसभा जागांसाठीही पोटनिवडणूक घेण्यात येतील. निवडणूक आयोगाने गोवा, गुजरात, कर्नाटक, महाराष्ट्र आणि नागालँडमधील आठ विधानसभा जागांसाठी पोटनिवडणूकांच्या तारखा जाहीर केल्या. गोवा, कर्नाटक, नागालँड आणि त्रिपुरा येथील पोटनिवडणुकांसाठी ९ एप्रिल रोजी मतदान होणार आहे. महाराष्ट्र आणि गुजरातमधील तीन जागांसाठी २३ एप्रिल रोजी पोटनिवडणुका होणार आहेत. यामध्ये बारामती मतदारसंघाचा समावेश आहे.

निवडणूक आयोगाने सांगितले की, पाच राज्यांच्या विधानसभांमधील ८२४ मतदारसंघांसाठी होणाऱ्या निवडणुकीत एकूण १७.४ कोटी मतदार मतदान करण्यास पात्र आहेत. चार राज्ये आणि एका केंद्रशासित प्रदेशातील २.१९ लाख मतदान केंद्रांवर मतदान होईल, जिथे २५ लाख निवडणूक अधिकारी कर्तव्यावर असतील. आसाम, केरळ, पुडुचेरी, तामिळनाडू आणि पश्चिम बंगालमध्ये प्रत्येक मतदान केंद्रावर सरासरी ७५०-९०० मतदार आहेत. मतदार यादीच्या विशेष सघन पुनरावृत्ती (SIR) दरम्यान बीएलओंनी केलेल्या चांगल्या कामाबद्दल कुमार यांनी त्यांचे अभिनंदन केले. त्यांनी सांगितले की, सर्व मतदान केंद्रांवर तैनात असलेले अध्यक्षीय अधिकारी दर दोन तासांनी मतदानाची टक्केवारी अपलोड करतील आणि निवडणुका संपल्यानंतर लगेचच मतदानाचा डेटा अपलोड केला जाईल.

---------------

हिंदुस्थान समाचार / वृषाली देशपांडे