तेहरान, 18 मार्च (हिं.स.)।इराणचे मुख्य सुरक्षा अधिकारी अली लारिजानी यांच्या मृत्यूनंतर इराण आक्रमक झाल्याचे दिसत आहे. त्यानंतर इराणने खाडी देशांवर क्षेपणास्त्र आणि ड्रोनद्वारे ताजे हल्ले केल्याची माहिती समोर आली आहे. या हल्ल्यांमुळे संपूर्ण मध्यपूर्वेत मृत्यू, विध्वंस, हिंसा आणि ऊर्जा संकटाचे सावट निर्माण झाले असून त्याचे परिणाम या प्रदेशापलीकडेही पसरताना दिसत आहेत.

मंगळवारी पहाटे कतारच्या संरक्षण मंत्रालयाने सांगितले की देशावर करण्यात आलेला एक क्षेपणास्त्र हल्ला त्यांच्या सशस्त्र दलांनी यशस्वीपणे परतवून लावला. त्याचवेळी कुवैत नॅशनल गार्डने पहाटेच्या सुमारास एक मानवरहित विमान (ड्रोन) पाडल्याची माहिती दिली. कुवैती सैन्याने काही तासांपूर्वीच शत्रूच्या क्षेपणास्त्र आणि ड्रोन हल्ल्यांना रोखत असल्याचे सांगितले होते.युएई, सौदी अरेबिया आणि बहरीन यांनीही अलीकडील काही तासांत अनेक क्षेपणास्त्रे आणि ड्रोन रोखल्याची माहिती दिली आहे. सौदी अरेबियाच्या संरक्षण मंत्रालयाने पूर्व भागात एक ड्रोन अडवून नष्ट केल्याचे सांगितले.

यापूर्वी मंगळवारी युएईच्या संरक्षण मंत्रालयाने जाहीर केले होते की देशाची हवाई संरक्षण प्रणाली सध्या इराणकडून येणाऱ्या क्षेपणास्त्र आणि ड्रोनच्या धोक्याला प्रत्युत्तर देत आहे. इराणकडून आणखी एका कथित हल्ल्याची बातमी समोर आल्यानंतर सुमारे चार तासांनी ही घोषणा करण्यात आली. त्यानंतर दुबईमध्ये मोठा स्फोट झाल्याचा आवाज ऐकू आला.

युद्ध सुरू झाल्यापासून खाडी देशांमध्ये अनेकांचा मृत्यू झाला असून आर्थिक परिणामही वेगाने जाणवू लागले आहेत. २८ फेब्रुवारीपासून सुरू झालेल्या संघर्षानंतर इराण सातत्याने खाडी देशांवर हल्ले करत आहे. अमेरिकेकडून युद्धासाठी वापरल्या जाणाऱ्या लष्करी तळांना लक्ष्य करत असल्याचा दावा इराणने केला आहे.मात्र खाडी देशांनी तेहरानचे हे दावे फेटाळून लावले असून, त्यांच्यावर होत असलेले हे हल्ले पूर्णपणे अनुचित आणि अन्यायकारक असल्याचे ठामपणे म्हटले आहे.

---------------

हिंदुस्थान समाचार / Priyanka Bansode