इस्लामाबाद, 22 मार्च, (हिं.स.) - पाकिस्तान सुपर लीगच्या (पीएसएल) आगामी हंगामात स्टेडियम रिकामे राहणार आहेत. पाकिस्तान क्रिकेट बोर्डाने आगामी हंगामातील सामन्यांना प्रेक्षकांना उपस्थित राहू न देण्याचा निर्णय घेतला आहे. पीसीबीने सुरक्षेच्या कारणास्तव हा निर्णय घेतला आहे. पण, यामुळे बोर्डाला कोट्यवधी रुपयांचे नुकसान होण्याची शक्यता आहे.
पश्चिम आशियामध्ये सुरू असलेल्या युद्धामुळे हा निर्णय घेण्यात आला आहे. सध्या इराण, इस्रायल आणि अमेरिका यांच्यात युद्ध सुरू आहे. याचा परिणाम दुबई, पाकिस्तानचा शेजारी देश संयुक्त अरब अमिरातीसह अनेक गोष्टींवर झाला आहे.
२६ मार्चपासून सुरू होणारी ही स्पर्धा यावेळी केवळ दोन शहरांमध्ये खेळवली जाईल. सध्या ही लीग पाकिस्तानमधील सहा शहरांमध्ये खेळवली जाते. पीसीबीचे प्रमुख मोहसिन नक्वी यांनी सांगितले की, परिस्थिती सुधारेपर्यंत प्रेक्षकांना स्टेडियममध्ये प्रवेश दिला जाणार नाही. याशिवाय, लीगचा उद्घाटन सोहळाही यावेळी होणार नाही. नक्वी यांनी असेही सांगितले की, लीगचे सामने फक्त कराची आणि लाहोरमध्येच खेळले जातील. लीगचा पहिला सामना लाहोर कलंदर्स आणि हैदराबाद किंग्समेन यांच्यात होणार आहे.
नक्वी यांनी सांगितले की, पाकिस्तानी सरकार, पंतप्रधान शाहबाज शरीफ आणि सुरक्षा यंत्रणा यांच्याशी बऱ्याच काळापासून चर्चा सुरू होती आणि देशाचे प्राधान्यक्रम लक्षात घेऊन हा अंतिम निर्णय घेण्यात आला. नक्वी म्हणाले, पीएसएल हा आमचा आंतरराष्ट्रीय ब्रँड आहे. यात अनेक आंतरराष्ट्रीय क्रिकेटपटू सहभागी आहेत. आम्ही ही स्पर्धा रद्द करू शकत नाही. आम्ही स्पर्धा सुरू ठेवण्याचा निर्णय घेतला आहे आणि पहिला सामना २६ मार्च रोजी खेळला जाईल. २५,०००-३०,००० क्रिकेटप्रेमींना सामावून घेणे सोपे नाही. जोपर्यंत संकट संपत नाही, तोपर्यंत स्टेडियममध्ये प्रेक्षक नसतील.
नक्वी यांनी सांगितले की, ज्या प्रेक्षकांनी सामन्याची तिकिटे खरेदी केली आहेत, त्यांना परतावा मिळेल. पंतप्रधानांनी तेलाच्या संकटाच्या पार्श्वभूमीवर पाकिस्तानमधील सर्वांना आपले उपक्रम मर्यादित ठेवण्याचे आवाहन केले आहे. आम्ही शाळा बंद केल्या आहेत आणि संस्थांना घरून काम करण्यास सांगितले आहे. आम्ही ईदच्या सुट्ट्याही वाढवल्या आहेत. हे युद्ध किती काळ चालेल हे आम्हाला माहीत नाही. ज्यांनी तिकीट खरेदी केले आहे, त्यांना पुढील ७२ तासांत परतावा मिळणार आहे.
---------------
हिंदुस्थान समाचार / वृषाली देशपांडे
