कोलकाता, 28 मार्च (हिं.स.)। पश्चिम बंगालच्या मुख्यमंत्री ममता बॅनर्जी यांनी शनिवारी भारतीय जनता पार्टी (भाजप) आणि निवडणूक आयोगावर जोरदार हल्ला चढवला. राज्यातील वरिष्ठ प्रशासकीय आणि पोलीस अधिकाऱ्यांच्या बदल्या या निवडणुकांवर प्रभाव टाकण्याच्या कटाचा भाग असल्याचा आरोप त्यांनी केला. विधानसभा निवडणुकीत भाजपला फायदा मिळवून देण्याच्या उद्देशाने हे पाऊल उचलण्यात आले आहे, असे त्या म्हणाल्या.

पश्चिम बर्धमान जिल्ह्यातील रानीगंज येथे एका जाहीर सभेला संबोधित करताना ममता बॅनर्जी म्हणाल्या की, भाजपने आता सर्व मर्यादा ओलांडल्या आहेत आणि राजकारणात शिष्टाचाराची एक रेषा असली पाहिजे, जी ओलांडली जाऊ नये.

मुख्यमंत्र्यांनी असा आरोप केला की, मोठ्या संख्येने अधिकाऱ्यांच्या इतर राज्यांमध्ये बदल्या करण्यात आल्या असून, स्थानिक परिस्थितीची चांगली जाण असलेल्या अधिकाऱ्यांना हटवून प्रशासन कमकुवत करण्यात आले आहे. राज्यात बाहेरील प्रभाव वाढवण्यासाठी आणि निवडणुकीच्या काळात परिस्थितीवर प्रभाव टाकण्यासाठी हे केले जात आहे, असे ते म्हणाले.मतदार यादीतून नावे वगळण्याच्या नावाखाली गैरप्रकार होत असून लोकशाही प्रक्रियेला सुरुंग लावण्याचे प्रयत्न केले जात असल्याचा आरोप त्यांनी केला.

ममता बॅनर्जी यांनी मुर्शिदाबाद जिल्ह्यातील रघुनाथगंज येथे रामनवमीच्या मिरवणुकीदरम्यान झालेल्या हिंसाचाराचाही उल्लेख केला. निवडणूक प्रक्रियेदरम्यानची प्रशासकीय यंत्रणा निवडणूक प्राधिकरणाच्या अखत्यारीत येत असल्याने, सध्या प्रशासन त्यांच्या नियंत्रणाखाली नाही, असे त्यांनी सांगितले. रघुनाथगंजमध्ये दुकानांची लूटमार आणि मालमत्तेचे नुकसान झाल्याच्या घटना घडल्या, परंतु यासाठी त्यांना दोष देऊ नये, कारण सध्या त्यांच्याकडे कोणतेही प्रशासकीय नियंत्रण नाही, असे त्या म्हणाल्या. हिंसाचार भडकवणाऱ्यांना योग्य वेळी सोडले जाणार नाही, असा इशाराही त्यांनी दिला.

भाजप सत्तेवर आल्यास बुलडोझरचे राजकारण सुरू होईल आणि लोकांना त्यांच्या घरातून बाहेर काढले जाईल, असा आरोप मुख्यमंत्र्यांनी केला. बेहाला परिसरातही अशाच प्रकारच्या घटना घडल्याचा दावा त्यांनी केला. ममता बॅनर्जी यांनी पीडित लोकांची माफी मागितली आणि राज्य सरकार त्यांची दुकाने व मालमत्ता पुन्हा बांधून देईल, असे सांगितले.

मुख्यमंत्री ममता बॅनर्जी यांनी भाजपवर पलटवार करत आरोप केला की, जो पक्ष तृणमूल काँग्रेसवर भ्रष्टाचाराचा आरोप करतो, तोच पक्ष अवैध कोळसा व्यापारातून पैसा कमावतो. त्यांनी भाजपवर दुटप्पीपणाचा आरोप केला.

आपल्या भाषणात ममता बॅनर्जी म्हणाल्या की, पश्चिम बंगाल सामाजिक सलोखा आणि जातीय ऐक्यासाठी ओळखले जाते. त्या म्हणाल्या की, राज्यात सर्व धर्मांचे लोक रामनवमी, दुर्गा पूजा, ईद आणि ख्रिसमससारखे सण एकत्र साजरे करतात आणि हीच बंगालची खरी ताकद आहे. मुख्यमंत्री ममता बॅनर्जी यांनी राणीगंजमधील भूस्खलनग्रस्त भागांसाठी पुनर्वसन पॅकेजची घोषणा केली. त्या म्हणाल्या की, मानवी जीवन सर्वात महत्त्वाचे आहे आणि कोणीही धोकादायक भागात राहू नये अशी सरकारची इच्छा आहे.

त्यांनी जाहीर केले की, जे लोक सुरक्षित ठिकाणी स्थलांतरित होऊ इच्छितात, त्यांना १० लाख रुपयांची आर्थिक मदत आणि दोन घरे दिली जातील. स्थलांतराचा संपूर्ण खर्चही सरकार उचलेल. त्यांनी सांगितले की, आतापर्यंत २,००० घरे बांधण्यात आली असून, आणखी ४,००० घरे बांधण्याची योजना आहे. ममता बॅनर्जी यांनी हेही स्पष्ट केले की, हे पुनर्वसन पूर्णपणे ऐच्छिक असेल. त्या म्हणाल्या की, सरकार कोणावरही सक्ती करत नाही, उलट लोकांनी स्वतःच्या सुरक्षेसाठी अधिक सुरक्षित ठिकाणी स्थलांतरित होण्याचा विचार करावा, असे आवाहन करत आहे. त्यांनी इशारा दिला की, जर मोठे भूस्खलन झाले, तर हजारो लोकांचे प्राण धोक्यात येऊ शकतात.

---------------

हिंदुस्थान समाचार / Suraj Chaugule