नवी दिल्ली, 29 मार्च (हिं.स.)पंतप्रधान नरेंद्र मोदी यांनी पहिल्यांदाच रणजी ट्रॉफीचे विजेतेपद पटकावल्याबद्दल जम्मू आणि काश्मीर क्रिकेट संघाचे कौतुक केले आणि भविष्यातही संघाची विजयाची मालिका कायम राहील अशी आशा व्यक्त केली. आपल्या 'मन की बात' या कार्यक्रमामध्ये पंतप्रधान मोदी म्हणाले की, देशभरातील क्रिकेट चाहत्यांसाठी मार्च महिना उत्साह आणि रोमांचने भरलेला होता. ते म्हणाले की, जेव्हा भारताने टी-२० विश्वचषक जिंकला, तेव्हा देशभरात आनंदाची लाट पसरली होती आणि संघाच्या या उल्लेखनीय यशाचा सर्व नागरिकांना अभिमान आहे.

ते म्हणाले की, जम्मू आणि काश्मीर क्रिकेट संघाने गेल्या महिन्याच्या अखेरीस कर्नाटकातील हुबळी येथे एका अत्यंत रोमांचक सामन्यात रणजी ट्रॉफी जिंकली. मोदी म्हणाले, जवळपास सात दशकांच्या प्रदीर्घ प्रतीक्षेनंतर या संघाने आपले पहिले रणजी ट्रॉफी विजेतेपद पटकावले आहे, ही अत्यंत आनंदाची बाब आहे. हे अभूतपूर्व यश क्रिकेटपटूंच्या अनेक वर्षांच्या अथक प्रयत्नांचे फळ आहे. ते म्हणाले, जम्मू आणि काश्मीर संघाचा कर्णधार पारस डोग्राने विलक्षण कौशल्य दाखवले. या विजयात त्याच्या नेतृत्वाने महत्त्वपूर्ण भूमिका बजावली.

पंतप्रधान मोदी म्हणाले की, रणजी करंडक हंगामात ६० विकेट्स घेणाऱ्या युवा काश्मिरी गोलंदाज आकिब नबीच्या कामगिरीचीही देशात चर्चा होत आहे. ते म्हणाले, जम्मू आणि काश्मीरचे लोक, खेळाडू आणि प्रशिक्षण कर्मचारी या विजयाने रोमांचित झाले आहेत. क्रिकेटच्या मैदानातील या उत्कृष्ट कामगिरीमुळे तेथील तरुणांमध्ये खेळाबद्दलचा उत्साह आणखी वाढला आहे. भविष्यात, यामुळे आणखी अनेक तरुणांना खेळ खेळण्यासाठी प्रेरणा मिळेल.

ते म्हणाले, जम्मू आणि काश्मीरच्या नागरिकांमध्ये खेळाबद्दल प्रचंड आवड आहे. मला आनंद आहे की हे शहर मोठ्या क्रीडा स्पर्धांचे केंद्र बनत आहे. मोदी म्हणाले की, गुलमर्गने खेलो इंडिया हिवाळी खेळांसाठी आधीच आपली ओळख निर्माण केली आहे आणि फुटबॉलसारखे खेळही तेथील तरुणांमध्ये खूप लोकप्रिय आहेत. ते म्हणाले, मला आशा आहे की जम्मू आणि काश्मीरच्या खेळाडूंची ही विजयाची मालिका भविष्यातही कायम राहील.

---------------

हिंदुस्थान समाचार / वृषाली देशपांडे