इस्लामाबाद, 31 मार्च, (हिं.स.) - पाकिस्तानी स्टार वेगवान गोलंदाज शाहीन आफ्रिदीला पीसीबीने १० लाख पाकिस्तानी रुपयांचा दंड ठोठावला आहे. लाहोर कलंदर्सचा कर्णधार संघाच्या हॉटेलमधील सुरक्षा नियमांचे उल्लंघन केल्याबद्दल दोषी आढळला. अंतर्गत चौकशीनंतर पीसीबीने आफ्रिदीला दंड ठोठावला. या घटनेत लाहोर कलंदर्सकडून खेळणारा झिम्बाब्वेचा सिकंदर रझा देखील सामील होता. शाहीन आणि सिकंदरने हॉटेलमध्ये चार परदेशी पाहुण्यांना आमंत्रित केले होते, ज्यासाठी त्यांना आता शिक्षा झाली आहे.

ही घटना तेव्हा घडली जेव्हा शाहीन आफ्रिदी आणि झिम्बाब्वेचा सिकंदर रझा यांच्यावर हॉटेलमध्ये परदेशी पाहुण्यांना आमंत्रित केल्याचा आरोप होता. खोलीत चार परदेशी पाहुण्यांना आणण्याची परवानगी मागण्यात आली होती, जी पीसीबी आणि सुरक्षा अधिकाऱ्यांनी सुरक्षेच्या कारणास्तव स्पष्टपणे नाकारली होती. असे असूनही, शाहीन आणि रझा यांनी रात्री ११ वाजण्याच्या सुमारास पाहुण्यांना त्यांच्या खोलीत नेले, जे पहाटे १:२५ पर्यंत तिथेच राहिले.

लाहोर कलंदर्स संघाने म्हटले आहे की, शिस्त राखण्यासाठी आणि उत्तरदायित्व सुनिश्चित करण्यासाठी, फ्रँचायझीने सक्रिय कारवाई केली असून, या प्रकरणात सहभाग असल्याबद्दल शाहीन शाह आफ्रिदीवर १० लाख पाकिस्तानी रुपयांचा (PKR) दंड आकारला आहे. लाहोर कलंदर्सने या प्रकरणावर आपली प्रतिक्रिया देत पाकिस्तान क्रिकेट बोर्डाला (PCB) एक सविस्तर प्रतिसाद औपचारिकपणे पाठवला आहे. फ्रँचायझीने सुरक्षा कर्मचाऱ्यांच्या प्रयत्नांची प्रशंसा केली असून, क्रिकेटपटू, अधिकारी आणि प्रेक्षकांसाठी सुरक्षित वातावरण सुनिश्चित करण्यात त्यांच्या महत्त्वपूर्ण भूमिकेची दखल घेतली आहे. ही घटना प्रस्थापित कार्यपद्धतींचे हेतुपुरस्सर उल्लंघन नसून गैरसमजातून घडली आहे, असे स्पष्ट करून लाहोर कलंदर्सने सर्व सुरक्षा नियमांबद्दल आपला पूर्ण आदर पुन्हा व्यक्त केला.

शाहीन आफ्रिदीवर १० लाख रुपयांचा दंड. पण, सिकंदर रझावर कोणतीही अधिकृत शिस्तभंगाची कारवाई करण्यात आली नाही. पत्रकार परिषदेत सिकंदर रझाने संपूर्ण जबाबदारी स्वीकारत म्हटले, या प्रकरणाची जबाबदारी माझी आहे. यासाठी शाहीनला दोष देऊ नये.

---------------

हिंदुस्थान समाचार / वृषाली देशपांडे