रायगड, 08 मार्च (हिं.स.)। माणगाव : तालुक्यातील एका अल्पवयीन मुलीवर प्रेमसंबंधाच्या नावाखाली अत्याचार झाल्याची धक्कादायक घटना उघडकीस आली असून या प्रकरणी माणगाव पोलीस ठाण्यात आरोपीविरुद्ध पोक्सो कायद्यांतर्गत गंभीर गुन्हा दाखल करण्यात आला आहे.

मिळालेल्या माहितीनुसार, आरोपी व पीडित मुलगी यांच्यात गेल्या दीड वर्षांपासून प्रेमसंबंध होते. या संबंधांमुळे दोन्ही कुटुंबीयांनी त्यांचा साखरपुडाही केला होता. पीडित मुलीचे वय १८ वर्षे पूर्ण झाल्यानंतर त्यांचे लग्न लावून देण्याचे ठरले होते. मात्र मुलगी अल्पवयीन असल्याचे माहिती असूनही आरोपीने तिच्यासोबत शारीरिक संबंध ठेवले.

परिणामी ती गर्भवती राहिली. दरम्यान, अचानक तब्येत बिघडल्याने तिला प्रथम माणगाव येथील शासकीय रुग्णालयात दाखल करण्यात आले. पुढील उपचारासाठी तिला अलिबाग जिल्हा रुग्णालयात हलविण्यात आले. तेथे डॉक्टरांनी शस्त्रक्रिया करून बाळाला जन्म दिला. मात्र जन्मलेले नवजात बाळ तीन दिवसांनी मृत झाले.

या प्रकरणी माणगाव पोलीस ठाण्यात गुन्हा क्रमांक ६८/२०२६ नोंदवून POCSO कायदा २०१२ चे कलम ४, ६, ८, १२ तसेच भारतीय न्याय संहिता कलम ६४(२)(i), ६५(१) अंतर्गत गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक जाधव करीत आहेत.

---------------

हिंदुस्थान समाचार / संदेश साळुंके (रायगड)