मुंबई, 08 मार्च (हिं.स.)। आंतरराष्ट्रीय महिला दिनाच्या निमित्ताने इलेक्ट्रिक दुचाकी बनवणाऱ्या झेलो इलेक्ट्रिक या कंपनीने आपला नवीन आणि मर्यादित आवृत्तीतील इलेक्ट्रिक स्कूटर Knight+ Rani Edition इलेक्ट्रिक स्कूटर भारतात लॉन्च केली आहे. ही खास स्कूटर महिलांना समर्पित करत बाजारात आणण्यात आला असून त्याचा आकर्षक बेबी पिंक रंग आणि वेगळी डिझाइन यामुळे ती विशेष लक्ष वेधून घेत आहे. कंपनीने या स्कूटरच्या फक्त ९९९ युनिट्सच विक्रीसाठी उपलब्ध करून दिल्या आहेत, त्यामुळे हा मॉडेल मर्यादित आवृत्ती म्हणून बाजारात ओळखला जाणार आहे.

या स्कूटरचा डिझाइन अतिशय वेगळा आणि स्टायलिश ठेवण्यात आला आहे. पेस्टल पिंक रंगाच्या बॉडीसोबत पांढऱ्या रंगाचे पॅनल आणि आकर्षक डिटेलिंग देण्यात आले आहे. त्यामुळे स्कूटरला आधुनिक आणि उठावदार लूक मिळतो. डिझाइनमध्ये बदल करण्यात आले असले तरी त्यातील फीचर्स आणि तांत्रिक वैशिष्ट्ये आधीपासून उपलब्ध असलेल्या नाईट प्लस मॉडेलप्रमाणेच ठेवण्यात आली आहेत. या स्कूटरची एक्स-शोरूम किंमत सुमारे ६९ हजार ९९० रुपये ठेवण्यात आली आहे.

ही स्कूटर खरेदी करू इच्छिणाऱ्या ग्राहकांसाठी बुकिंग प्रक्रिया सुरू करण्यात आली आहे. इच्छुक ग्राहक कंपनीच्या अधिकृत विक्री केंद्रांवर जाऊन स्कूटरची नोंदणी करू शकतात. कंपनीचे सहसंस्थापक आदित्य बहेती यांनी या लॉन्चवेळी सांगितले की, प्रत्येक व्यक्तीला मुक्तपणे आणि सहजपणे प्रवास करता यावा ही कंपनीची नेहमीची भूमिका आहे. त्यांच्या मते ‘राणी एडिशन’ हा देशाच्या प्रगतीत महत्त्वाची भूमिका बजावणाऱ्या महिलांना समर्पित आहे.

कंपनीचे दुसरे सहसंस्थापक मुकुंद बहेती यांनी सांगितले की या स्कूटरचा रंग आणि डिझाइन तयार करताना ‘राणी’ हा शब्द त्यांच्या मनात होता. भारतीय संस्कृतीत ‘राणी’ म्हणजे आत्मविश्वास, ताकद आणि स्वतःची वेगळी ओळख यांचे प्रतीक मानले जाते आणि त्याच भावनेचे प्रतिबिंब या स्कूटरमध्ये दाखवण्याचा प्रयत्न करण्यात आला आहे.

तांत्रिक बाबींविषयी बोलायचे झाले तर या स्कूटरमध्ये १.८ किलोवॅट तास क्षमतेची काढता येणारी एलएफपी बॅटरी देण्यात आली आहे. ही बॅटरी सहजपणे वेगळी काढून घरात चार्ज करता येते. कंपनीच्या दाव्यानुसार एकदा पूर्ण चार्ज केल्यावर हा स्कूटर सुमारे १०० किलोमीटरपर्यंत धावू शकतो. यात १.५ किलोवॅट क्षमतेचा मोटर देण्यात आला असून त्याची कमाल गती ताशी सुमारे ५५ किलोमीटर आहे. तसेच हिल होल्ड नियंत्रण, क्रूझ नियंत्रण, फॉलो-मी-होम हेडलाइट, यूएसबी चार्जिंग पोर्ट आणि काढता येणारी बॅटरी यांसारखी उपयुक्त सुविधा देखील यात देण्यात आल्या आहेत.

---------------

हिंदुस्थान समाचार / Suraj Chaugule