नवी दिल्ली, ११ एप्रिल (एचएस): इराणमध्ये अडकलेले ३१२ भारतीय मच्छीमार अर्मेनियामार्गे सुखरूप परतले आहेत. परराष्ट्र मंत्री डॉ. एस. जयशंकर यांनी 'एक्स' या सोशल मीडिया प्लॅटफॉर्मवर घोषणा केली की, ३१२ भारतीय मच्छीमारांना इराणमधून भारतात सुखरूप परत आणण्यात आले आहे. त्यांनी अर्मेनिया सरकार आणि परराष्ट्र मंत्री अरारत मिर्झोयान यांचे विशेष आभार मानले. जयशंकर म्हणाले की, ही अवघड मोहीम केवळ अर्मेनियाच्या सहकार्यानेच शक्य झाली.
परराष्ट्र मंत्रालय, भारतीय दूतावास आणि स्थानिक प्रशासन यांसारख्या अनेक संस्थांच्या समन्वयातून ही संपूर्ण मोहीम यशस्वीरित्या पार पडली.हे मच्छीमार विविध कारणांमुळे बऱ्याच काळापासून इराणमध्ये अडकले होते. त्यांच्या सुरक्षित परतीसाठी भारत सरकारने अथक प्रयत्न केले. त्यांना प्रथम इराणमधून बाहेर काढून अर्मेनियाला आणण्यात आले, जिथून त्यांना विमानाने भारतात आणण्यात आले. सर्व आवश्यक कागदपत्रे आणि सुरक्षा नियमांचे पालन करण्यात आले. प्रवासादरम्यान त्यांच्या अन्न, आरोग्य तपासणी आणि इतर सुविधांकडे विशेष लक्ष देण्यात आले.
यापूर्वी ५ एप्रिल रोजी, पश्चिम आशियातील सुरू असलेल्या लष्करी संघर्षादरम्यान इराणमध्ये अडकलेले एकूण ३४५ भारतीय मच्छीमार अर्मेनियामार्गे चेन्नईला सुखरूप पोहोचले होते.
---------------
हिंदुस्थान समाचार / वृषाली देशपांडे
