ढाका, ११ एप्रिल (हिं.स.) हबीबुल बशर यांच्या नेतृत्वाखालील बांगलादेशच्या नवीन निवड समितीने गेल्या महिन्यात मायदेशात पाकिस्तानला २-१ ने पराभूत करणाऱ्या न्यूझीलंड विरुद्धच्या पहिल्या दोन एकदिवसीय सामन्यांसाठी तोच १५ सदस्यीय संघ कायम ठेवला आहे. मालिकेतील पहिले दोन सामने १७ आणि २० एप्रिल रोजी ढाका येथे, तर तिसरा सामना २३ एप्रिल रोजी चट्टोग्राम येथे खेळवला जाणार आहे.

मेहिदी हसन मिराज संघाचे नेतृत्व करणार आहे. काही फलंदाजांच्या कामगिरीबद्दल प्रश्नचिन्ह कायम आहे. पाकिस्तानविरुद्धच्या तीन डावांमध्ये सैफ हसन आणि अफिफ होसेन यांची सरासरी अनुक्रमे १७.३३ आणि १९ होती, जी अपेक्षेपेक्षा कमी होती.

वेगवान गोलंदाजी विभागात कोणताही बदल केलेले नाहीत. निवड समितीने नाहिद राणा, तस्किन अहमद, मुस्तफिजुर रहमान आणि शोरिफुल इस्लाम यांच्यावर विश्वास कायम ठेवला आहे. गोलंदाजांना आलटून पालटून खेळवण्याच्या अलीकडील धोरणाच्या विपरीत, हे एक स्थिर संयोजन मानले जात आहे.

बांग्लादेश संघातील पाच क्रिकेटपटू सध्या पाकिस्तानमध्ये सुरू असलेल्या लीगमध्ये खेळत आहेत. हे सर्व क्रिकेटपटू १२ एप्रिल रोजी राष्ट्रीय संघात सामील होतील. एकदिवसीय मालिका संपल्यानंतर केवळ मुस्तफिजुर रहमान लीगमध्ये परतणार आहे. यानंतर, दोन्ही देशांमध्ये तीन टी-20 सामनेही खेळले जातील.

बांग्लादेशचा १५ सदस्यीय संघ खालीलप्रमाणे

मेहिदी हसन मिराज (कर्णधार), सौम्य सरकार, सैफ हसन, तंजीद हसन, नजमुल होसेन शांतो, तौहिद हृदोय, लिटन दास (यष्टीरक्षक), अफिफ होसेन, महिदुल इस्लाम, रिशाद होसेन, तन्वीर इस्लाम, मुस्तफिजुर रहमान, तस्किन अहमद, शोरिफुल इस्लाम आणि नाहिद राणा.

---------------

हिंदुस्थान समाचार / वृषाली देशपांडे