नाशिक, 15 एप्रिल (हिं.स.) : भारतातील प्रमुख ई-कॉमर्स कंपनी फ्लिपकार्टने देशातील आघाडीचा मोबिलिटी प्लॅटफॉर्म उबरसोबत धोरणात्मक भागीदारीची घोषणा केली आहे. या नव्या उपक्रमांतर्गत उबर युजर्सना प्रत्येक पात्र राईडवर फ्लिपकार्टचे सुपरकॉइन्स मिळणार असून, हे रिवॉर्ड्स आता दैनंदिन प्रवासाशी थेट जोडले जाणार आहेत.

या भागीदारीमुळे फ्लिपकार्टच्या सुपरकॉइन्स प्रोग्रामचा विस्तार होऊन तो केवळ खरेदीपुरता मर्यादित न राहता “लाइफस्टाइल लॉयल्टी प्रोग्राम” म्हणून अधिक व्यापक होणार आहे. यामुळे वापरकर्त्यांना त्यांच्या रोजच्या प्रवासावरही रिवॉर्ड्स मिळण्याची सुविधा उपलब्ध होईल.अकाउंट लिंक केल्यानंतर युजर्सना प्रत्येक पात्र उबर राईडवर भाड्याच्या 4 टक्के इतके सुपरकॉइन्स मिळतील. प्रत्येक ट्रिपमध्ये कमाल 150 कॉइन्स मिळू शकतात, तर एकूण कमाईवर कोणतीही मर्यादा नाही. हे सुपरकॉइन्स थेट युजरच्या फ्लिपकार्ट खात्यात जमा होतील आणि त्यांचा वापर Flipkart Minutes, Cleartrip तसेच इतर भागीदार प्लॅटफॉर्म्सवर करता येईल.

भागीदारीअंतर्गत मर्यादित कालावधीसाठी विशेष ऑफर्सही जाहीर करण्यात आल्या आहेत. नवीन उबर युजर्स किंवा गेल्या 84 दिवसांपासून सक्रिय नसलेल्या युजर्सना, अकाउंट लिंक केल्यानंतर 28 दिवसांच्या आत पहिली राईड पूर्ण केल्यास 150 बोनस सुपरकॉइन्स मिळतील. तसेच 15 ते 30 एप्रिल 2026 दरम्यान अकाउंट लिंक करून 28 दिवसांत पहिली राईड पूर्ण करणाऱ्या युजर्सना अतिरिक्त 50 बोनस सुपरकॉइन्स दिले जातील. फ्लिपकार्टचे व्हाईस प्रेसिडेंट (पेमेंट्स आणि सुपरकॉइन्स) गौरव अरोरा यांनी सांगितले की, सुपरकॉइन्सना केवळ शॉपिंगपुरते मर्यादित न ठेवता दैनंदिन जीवनाचा भाग बनवण्याचा कंपनीचा उद्देश आहे. उबरसोबतची ही भागीदारी ग्राहकांना अधिक व्यापक फायदे देईल, असे त्यांनी नमूद केले.

उबरचे इंडिया आणि दक्षिण आशियाचे बिझनेस डेव्हलपमेंट डायरेक्टर अर्णब कुमार यांनी सांगितले की, ग्राहकांचा रोजचा प्रवास अधिक सुलभ आणि फायदेशीर बनवणे हे उबरचे ध्येय आहे. या भागीदारीमुळे रायडर्सना सोप्या पद्धतीने अतिरिक्त लाभ मिळतील, असे त्यांनी स्पष्ट केले.

ही भागीदारी दोन मोठ्या डिजिटल प्लॅटफॉर्म्सना एकत्र आणत असून, दैनंदिन सेवांमध्ये रिवॉर्ड्सचा वापर वाढवण्याच्या दिशेने एक महत्त्वाचे पाऊल मानले जात आहे.

---------------------------

हिंदुस्थान समाचार / मनीष कुलकर्णी