जळगाव, 17 एप्रिल (हिं.स.) : साडेतीन मुहूर्तांपैकी एक महत्त्वाचा मुहूर्त असलेल्या अक्षय तृतीयेच्या पार्श्वभूमीवर ग्राहकांसाठी दिलासादायक बातमी समोर आली आहे. Jalgaon येथे सोन्या-चांदीच्या दरात आज पुन्हा घट नोंदवण्यात आली आहे.

मिळालेल्या माहितीनुसार, सोन्याच्या दरात सुमारे ₹१,३०० ची घसरण झाली असून गुरुवारी ₹१,५३,३०० प्रति तोळा असलेला दर शुक्रवारी ₹१,५२,००० वर आला आहे. त्याचप्रमाणे चांदीच्या दरातही मोठी घसरण झाली असून ₹३,००० नी घट होऊन ती ₹२,५३,००० प्रति किलोवर पोहोचली आहे.

अक्षय तृतीयेच्या शुभ मुहूर्ताच्या पार्श्वभूमीवर झालेली ही घसरण ग्राहकांसाठी मोठा दिलासा मानली जात आहे. या काळात सोने-चांदी खरेदीची परंपरा असल्याने बाजारात खरेदीची उत्सुकता वाढली आहे.

आंतरराष्ट्रीय बाजारातील घडामोडी, विशेषतः अमेरिका, इस्रायल आणि इराण यांच्यातील तणावामुळे मागील काही दिवसांत दरात चढ-उतार सुरू होते. मात्र अलीकडे अमेरिकेकडून शस्त्रसंधीचे संकेत मिळाल्यानंतर गुंतवणूकदारांनी नफा वसुली केल्यामुळे दरात ही घसरण झाल्याचे तज्ज्ञांचे म्हणणे आहे.

‘जळगाव सुवर्णनगरी’ म्हणून ओळखल्या जाणाऱ्या जळगावमध्ये अक्षय तृतीयेच्या दिवशी मोठ्या प्रमाणात खरेदी-विक्री होण्याची शक्यता सराफा व्यावसायिकांनी व्यक्त केली आहे. त्यामुळे ग्राहकांसाठी सोन्या-चांदीची खरेदी अधिक अनुकूल मानली जात आहे.

------------------------

हिंदुस्थान समाचार / मनोहर कांडेकर