वॉशिंग्टन, 17 एप्रिल (हिं.स.)।अमेरिकेचे राष्ट्राध्यक्ष डोनाल्ड ट्रम्प यांनी म्हटले आहे की इराणसोबत त्यांचे संबंध खूप चांगले आहेत. 40 दिवसांहून अधिक काळ चाललेल्या संघर्षानंतर निर्माण झालेल्या तणावपूर्ण शांततेच्या पार्श्वभूमीवर त्यांच्या या वक्तव्याला यू-टर्न म्हणूनही पाहिले जात आहे. ट्रम्प यांनी असेही सांगितले की इराणसोबत करार झाल्यास ते त्या करारावर स्वाक्षरी करण्यासाठी पाकिस्तानला जाऊ शकतात. याशिवाय ट्रम्प यांनी भारत-अमेरिका संबंधांवरही भाष्य केले.

ट्रम्प यांनी पंतप्रधान नरेंद्र मोदी यांना आपला “मित्र” संबोधत सांगितले की, मोदींसोबत फोनवर त्यांची चर्चा “खूप चांगली” झाली. पंतप्रधान मोदी यांनीही ट्रम्प यांच्या फोन कॉलची पुष्टी केली होती. दोन्ही नेत्यांनी पश्चिम आशियातील परिस्थिती आणि सागरी सुरक्षेवर चर्चा केली. विशेषतः होर्मुझ सामुद्रधुनी खुली आणि सुरक्षित ठेवण्यावर त्यांनी भर दिला. अमेरिकेचे राजदूत सर्जियो गोर यांनीही या चर्चेला सकारात्मक म्हटले.

दरम्यान, ट्रम्प यांनी असेही सांगितले की इराणसोबत करार झाल्यास ते त्या करारावर स्वाक्षरी करण्यासाठी पाकिस्तानला जाऊ शकतात. त्यांनी इस्रायल-लेबनान युद्धविरामाबाबतही विधान केले असून, लेबनानचे राष्ट्रपती जोसेफ आउन आणि इस्रायलचे पंतप्रधान बेंजामिन नेतन्याहू यांच्याशी त्यांनी चर्चा केली.

ट्रम्प यांनी दावा केला की त्यांच्या दुसऱ्या कार्यकाळात त्यांनी दहावे युद्ध रोखण्यात यश मिळवले आहे. “डोनरो सिद्धांत” हा शब्दप्रयोग त्यांच्या 2026 च्या परराष्ट्र धोरणाच्या संदर्भात वापरला जातो. या तत्त्वानुसार “अमेरिका प्रथम आणि फक्त अमेरिका” या भूमिकेवर भर दिला जातो. हा “डोनरो सिद्धांत” माजी राष्ट्राध्यक्ष जेम्स मुनरो यांच्या “मोनरो सिद्धांत” वर आधारित आहे. 1823 मध्ये मुनरो यांनी युरोपियन वसाहतवाद थांबवण्याची घोषणा केली होती. त्यांनी स्पष्ट केले होते की अमेरिकेत कोणताही हस्तक्षेप हा अमेरिकेविरुद्ध शत्रुत्व मानला जाईल. गेल्या सुमारे 200 वर्षांपासून या धोरणाचा संदर्भ दिला जात आहे.

ट्रम्प यांनी गुरुवारी इराणविरुद्ध लवकरच विजय मिळवण्याचा दावा केला. त्यांनी इराणच्या लष्करी क्षमतेत मोठी घट झाल्याचे सांगितले. ट्रम्प यांनी इराणला “कठीण पण हुशार देश” असे म्हटले, मात्र त्यांची नौदल शक्ती संपुष्टात आल्याचा दावा केला. त्यांनी सांगितले की इराणची 158 जहाजे समुद्रात बुडाली आहेत.तसेच, त्यांनी इराणी कमांडर घोलमरेजा सुलेमानी यांना लक्ष्य केल्याचा उल्लेख केला. त्यांनी सुलेमानी यांना “सर्वात वाईट दहशतवाद्यांपैकी एक” असे संबोधले आणि अमेरिकन सैनिकांवरील हल्ल्यांसाठी त्यांना जबाबदार ठरवले.

पश्चिम आशियातील वाढत्या तणावाच्या पार्श्वभूमीवर ट्रम्प यांनी इराणसोबतच्या युद्धविरामाच्या विस्ताराबाबत अनिश्चितता व्यक्त केली. मात्र, लवकरच इराणसोबत करार होण्याची शक्यता त्यांनी व्यक्त केली. त्यांनी पुन्हा एकदा स्पष्ट केले की इराणला अण्वस्त्र मिळवण्यापासून रोखणे हे मुख्य उद्दिष्ट आहे.पुढील फेरीची चर्चा आठवड्याच्या शेवटी होण्याची शक्यता आहे.

---------------

हिंदुस्थान समाचार / Priyanka Bansode