कोलकाता, 25 एप्रिल (हिं.स.) : गेल्या २३ एप्रिल रोजी झालेल्या पश्चिम बंगाल विधानसभा निवडणुकीच्या पहिल्या टप्प्यात पक्षपाताचा आरोप असलेल्या पोलीस अधिकाऱ्यांना निलंबित करण्यात आले आहे. यामध्ये एका आयपीएस अधिकारी, एका एसडीपीओ आणि एका प्रभारी निरीक्षकासह पाच अधिकाऱ्यांना निलंबित करण्यात आले आहे. निवडणूक आयोगाने या अधिकाऱ्यांच्या निलंबनाचे आदेश दिले होते. आता त्यांच्यावर शिस्तभंगाची कारवाई करण्यात आली आहे. या अधिकाऱ्यांवर गंभीर गैरवर्तन आणि पक्षपाताचा आरोप आहे. निवडणूक आयोगाने त्यांच्यावर कठोर कारवाई केली आहे.

मतदानाच्या दिवशी निष्पक्षतेचा अभाव आणि गैरवर्तन केल्याबद्दल निवडणूक आयोगाने अनेक अधिकाऱ्यांवर निलंबनासह शिस्तभंगाची कारवाई सुरू करण्याचा आदेश जारी केला होता.

संदीप गराई, आयपीएस, अतिरिक्त पोलीस अधीक्षक, डायमंड हार्बर

सजल मंडल, एसडीपीओ, डायमंड हार्बर

मौसम चक्रवर्ती, प्रभारी निरीक्षक, डायमंड हार्बर पोलीस स्टेशन

अजय बाग, प्रभारी निरीक्षक, फाल्टा पोलीस स्टेशन

सुभेच्छा बाग, प्रभारी अधिकारी, उस्ती पोलीस स्टेशन

उपरोक्त पाच अधिकाऱ्यांना निलंबित करण्यात आले आहे. दरम्यान, निवडणुकांसारख्या संवेदनशील बाबींमध्ये आपल्या अधीनस्थ अधिकाऱ्यांमध्ये शिस्त आणि निष्पक्षता सुनिश्चित करण्यात अपयशी ठरल्याबद्दल डायमंड हार्बरच्या पोलीस अधीक्षक डॉ. इशानी पाल यांना ताकीद देण्यात आली आहे.

सर्व निलंबित पोलीस अधिकारी डायमंड हार्बर परिसरातील आहेत. निवडणूक आयोगाने उपलब्ध पुराव्यांच्या आधारे त्यांच्यावर शिस्तभंगाची कारवाई करण्याचे आदेश दिले आहेत. त्या सर्वांवर गैरवर्तन आणि पक्षपाताचा आरोप आहे. निलंबित अधिकाऱ्यांच्या यादीत पहिले नाव डायमंड हार्बरचे अतिरिक्त पोलीस अधीक्षक संदीप गराई यांचे आहे.२३ एप्रिल रोजी बंगालमधील १५२ जागांसाठीच्या मतदानाच्या पहिल्या टप्प्यादरम्यान अनेक ठिकाणी तुरळक संघर्षाच्या घटना घडल्याची माहिती आहे. भाजपच्या उमेदवारांवर हल्ला करण्यात आला आणि एका उमेदवाराचा पाठलाग करून त्याला मारहाणही करण्यात आली होती.

---------------

हिंदुस्थान समाचार / वृषाली देशपांडे