तेहरान , 03 एप्रिल (हिं.स.)।मध्य पूर्वेमध्ये सुरू असलेल्या युद्धाच्या पार्श्वभूमीवर अमेरिका-इस्रायलने इराणमधील सर्वात उंच बी1 (B1) पुलावर हल्ला केला असून त्यामुळे मध्य पूर्वेतील तणाव आणखी वाढला आहे. पुलावरील हल्ल्यानंतर इराणने प्रत्युत्तरात्मक कारवाईची तयारी सुरू केली आहे. इराणच्या सरकारी वृत्तसंस्थेने आखाती देश आणि जॉर्डनमधील आठ महत्त्वाच्या पुलांची यादी प्रसिद्ध केली असून, इस्लामिक रिव्होल्यूशनरी गार्ड कॉर्प्स (आयआरजीसी) ने संभाव्य लक्ष्य म्हणून त्यांची नोंद केल्याचे सांगितले आहे.

अहवालानुसार, इराणच्या यादीत कुवैतमधील शेख जाबेर अल-अहमद अल-सबाह समुद्री पूल, संयुक्त अरब अमिरातीतील (UAE) शेख झायेद पूल, अल मकता पूल आणि शेख खलिफा पूल, सौदी अरेबियाला बहरीनशी जोडणारा किंग फहद कॉजवे, तसेच जॉर्डनमधील किंग हुसेन पूल, दामिया पूल आणि अब्दौन पूल यांचा समावेश आहे.

अमेरिकेचे राष्ट्राध्यक्ष डोनाल्ड ट्रम्प यांनी इराणला “पाषाण युगात परत पाठवू” अशी धमकी दिल्यानंतर हा हल्ला झाल्याचे सांगितले जात आहे. गुरुवारी झालेल्या अमेरिका-इस्रायली हल्ल्यात मध्य पूर्वेतील सर्वात उंच पुलाचे अंशतः नुकसान झाले. १३६ मीटर उंच असलेला बी1 पूल अद्याप बांधकामाधीन होता आणि तो तेहरानला पश्चिमेकडील कराज शहराशी जोडणार होता. या हल्ल्यात अनेक जण जखमी झाले.

इराणच्या सरकारी माध्यमांनी अल्बोरज प्रांतातील अधिकाऱ्यांच्या हवाल्याने सांगितले की, अमेरिकेने केलेल्या या हल्ल्यात किमान आठ जणांचा मृत्यू झाला असून सुमारे ९५ जण जखमी झाले आहेत. हे लोक ‘निसर्ग दिन’ साजरा करण्यासाठी जवळच्या परिसरात जमले होते.

राष्ट्राध्यक्ष ट्रम्प यांनी तेहरानपासून सुमारे ३५ किमी दक्षिण-पश्चिमेला असलेल्या बी1 पुलावरून धूर निघतानाचे व्हिडिओ फुटेज पोस्ट करत इशारा दिला की, जर इराणने पाच आठवड्यांपासून सुरू असलेल्या युद्धावर तोडगा काढण्यासाठी चर्चेला तयारी दाखवली नाही, तर आणखी मोठे विध्वंस घडतील.ट्रम्प म्हणाले, “इराणचा सर्वात मोठा पूल कोसळला आहे आणि त्याचा पुन्हा कधीही वापर होणार नाही. अजून बरेच काही होणार आहे. खूप उशीर होण्यापूर्वी इराणने करार करण्याची हीच योग्य वेळ आहे, अन्यथा महान राष्ट्र बनण्याची त्याची आशाही उरणार नाही.”

दरम्यान, इराणचे परराष्ट्र मंत्री अब्बास अराघची यांनी सोशल मीडियावरील पोस्टमध्ये म्हटले, “अपूर्ण पुलांसह नागरी पायाभूत सुविधांवर हल्ला करून इराणी जनतेला शरणागती पत्करण्यास भाग पाडता येणार नाही. उलट हे विस्कळीत झालेल्या शत्रूच्या पराभवाचे आणि खचलेल्या मनोबलाचेच प्रतीक आहे.”

---------------

हिंदुस्थान समाचार / Priyanka Bansode