व्हिडीओ जारी करत फेटाळून लावले एक्झिट पोलचे अंदाज

कोलकाता, 30 एप्रिल (हिं.स.) : पश्चिम बंगालच्या मुख्यमंत्री ममता बॅनर्जी यांनी राज्यातील निवडणुकांबाबत आलेल्या एक्झिट पोलच्या अंदाजांना पूर्णपणे फेटाळून लावले आहे. या अंदाजांमध्ये तृणमूल काँग्रेस (टीएमसी) आणि भारतीय जनता पक्ष (भाजप) यांच्यात कडवी लढत दिसत असल्याचे सूचित करण्यात आले होते.

विधानसभा निवडणुकीच्या दुसऱ्या आणि अंतिम टप्प्याचे मतदान पार पडल्यानंतर, मुख्यमंत्री ममता बॅनर्जी यांनी गुरुवारी एक मोठा दावा केला की राज्यात पुन्हा एकदा “मां-माटी-मानुष” सरकार स्थापन होणार आहे. ममतांनी एका व्हिडिओ संदेशाद्वारे सांगितले की त्यांचा पक्ष 294 पैकी 226 पेक्षा अधिक जागा जिंकून पुन्हा सत्तेत येईल. त्यांनी आपल्या संदेशात “जय बांग्ला”चा नारा देत कार्यकर्त्यांचा उत्साह वाढवला. तसेच त्यांनी विश्वास व्यक्त केला की जनतेचा पाठिंबा त्यांच्या पक्षासोबत आहे आणि निवडणुकीचे अंतिम निकालही त्याच दिशेने असतील. त्यांनी एक्झिट पोलवरही प्रश्नचिन्ह उपस्थित केले आणि आरोप केला की हे अंदाज भाजपच्या सूचनेनुसार प्रसारित केले जात आहेत, ज्यामुळे तृणमूल कार्यकर्त्यांचा आत्मविश्वास कमी करण्याचा प्रयत्न केला जात आहे.

मुख्यमंत्र्यांनी सांगितले की त्यांचा पक्ष तळागाळात मजबूत आहे आणि प्रत्यक्ष निकाल एक्झिट पोलपेक्षा वेगळे असतील. त्यांनी कार्यकर्त्यांना कोणत्याही प्रकारच्या संभ्रमात न पडता मतमोजणीपर्यंत सतर्क राहण्याचे आवाहन केले. तसेच त्यांनी पक्ष कार्यकर्ते आणि नेत्यांना मतमोजणी केंद्रांबाहेर दिवसरात्र पहारा देण्याचे आवाहन केले, जेणेकरून कोणतीही गैरप्रकार होऊ नये. आता सर्वांचे लक्ष 4 मे रोजी होणाऱ्या मतमोजणीकडे लागले आहे.

-------------------------

हिंदुस्थान समाचार / मनीष कुलकर्णी