नवी दिल्ली, 13 मे (हिं.स.)। देशाचे माजी राष्ट्रपती फखरुद्दीन अली अहमद यांच्या जयंतीनिमित्त राष्ट्रपती द्रौपदी मुर्मू यांनी बुधवारी राष्ट्रपती भवनात त्यांच्या प्रतिमेला पुष्पांजली अर्पण केली. यावेळी केंद्रीय मंत्री नितीन गडकरी आणि काँग्रेस खासदार डॉ. सय्यद नासिर हुसेन यांनी एक्स पोस्टद्वारे त्यांना श्रद्धांजली वाहिली.

राष्ट्रपतींच्या अधिकृत एक्स हँडलवरील पोस्टमध्ये म्हटले आहे की, भारताचे माजी राष्ट्रपती फखरुद्दीन अली अहमद यांना त्यांच्या जयंतीनिमित्त राष्ट्रपती भवनात पुष्पांजली अर्पण करण्यात आली. केंद्रीय रस्ते वाहतूक आणि महामार्ग मंत्री नितीन गडकरी यांनी एक्स पोस्टद्वारे जयंतीनिमित्त विनम्र अभिवादन केले. तर काँग्रेस खासदार डॉ. सय्यद नासिर हुसेन यांनी म्हटले की, फखरुद्दीन अली अहमद यांचे राष्ट्राप्रती समर्पण तसेच घटनात्मक मूल्ये आणि लोकशाही संस्थांप्रती असलेली त्यांची बांधिलकी पुढील पिढ्यांना प्रेरणा देत राहील.

विशेष म्हणजे, फखरुद्दीन अली अहमद हे भारताचे पाचवे राष्ट्रपती होते. त्यांचा जन्म १३ मे १९०५ रोजी दिल्ली येथे झाला होता, तर ११ फेब्रुवारी १९७७ रोजी कार्यकाळातच नवी दिल्ली येथे त्यांचे निधन झाले. ते व्यवसायाने वकील होते आणि त्यांनी स्वातंत्र्य संग्रामात सक्रिय भूमिका बजावली होती. १९४२ च्या भारत छोडो आंदोलनात त्यांना अटकही करण्यात आली होती.

जवाहरलाल नेहरू यांचे निकटवर्तीय सहकारी असलेले अहमद यांनी आसाममधून आपल्या राजकीय कारकिर्दीची सुरुवात केली आणि अनेक वेळा खासदार म्हणून निवडून आले. त्यांनी केंद्र सरकारमध्ये शिक्षण, सिंचन आणि ऊर्जा, उद्योग तसेच कृषी मंत्रालयांची जबाबदारी सांभाळली होती.

ते १९७४ ते १९७७ या काळात राष्ट्रपती पदावर होते आणि त्यांच्या कार्यकाळातच १९७५ मध्ये देशात आणीबाणी लागू करण्यात आली होती. कार्यकाळात निधन झालेले ते भारताचे दुसरे राष्ट्रपती होते. त्यांच्या योगदानाची दखल घेत उत्तर प्रदेश सरकारने १९७६ मध्ये ‘फखरुद्दीन अली अहमद मेमोरियल समिती’ची स्थापना केली होती. ही समिती आजही उर्दू, अरबी आणि फारसी भाषेच्या विद्यार्थ्यांना सुवर्णपदक आणि शिष्यवृत्ती प्रदान करते. तसेच पीएचडी आणि डी.लिट. संशोधकांना उर्दू साहित्य आणि भाषेच्या प्रचार-प्रसारासाठी आर्थिक सहाय्यही उपलब्ध करून देते.

---------------

हिंदुस्थान समाचार / Suraj Chaugule