-डीएमकेचा विश्वासदर्शक ठरावावर बहिष्कार -एआयएडीएमकेच्या एका गटाचा पाठिंबा तर दुसऱ्या गटाकडून विरोध-एकमेव भाजप आमदाराची कामकाजादरम्यान तटस्थ भूमिका

चेन्नई, 13 मे (हिं.स.)तामिळनाडूमध्ये सी. जोसेफ विजय यांच्या टीव्हीके सरकारने विश्वासदर्शक ठराव यशस्वी केला आहे. तामिळनाडू विधानसभेचे अध्यक्ष जे.सी.डी. प्रभाकर यांनी ही घोषणा केली. १४४ आमदारांनी विश्वासदर्शक ठरावाच्या बाजूने, तर २२ आमदारांनी विरोधात मतदान केले. पाच आमदार अनुपस्थित होते. यापूर्वी, विश्वासदर्शक ठरावादरम्यान काँग्रेस आणि डाव्या पक्षांनी सरकारला पाठिंबा दिला. विरोधी पक्ष डीएमके सभागृहातून बाहेर पडला आणि तटस्थ राहिला. भाजपने आपल्या एकमेव आमदारासह 'तटस्थ' भूमिका घेतली.

मुख्यमंत्री विजय यांनी विश्वासदर्शक ठरावासाठी प्रस्ताव मांडला. संबंधित पक्षांच्या सभागृह नेत्यांना प्रथम बोलण्याची परवानगी देण्यात आली. एआयएडीएमकेचे सरचिटणीस के. पलानीस्वामी यांनी कामकाजादरम्यान विजय यांच्या सरकारला विरोध केला. बंडखोर पक्षाचे नेते एस. पी. वेलुमणी यांनी टीव्हीके सरकारला पाठिंबा जाहीर केला, तर पलानीस्वामी गटाने त्याला विरोध केला. प्रमुख विरोधी पक्ष डीएमकेने सभात्याग केला आणि मतदानात भाग घेतला नाही.

काँग्रेस, सीपीआय, सीपीआय(एम), व्हीसीके, आययूएमएल आणि एएमएमके यांनी सरकारला पाठिंबा दिला, तर भाजपने आपली भूमिका 'तटस्थ' असल्याचे म्हटले. चार आमदार असलेल्या आणि अंबुमणी रामदास यांच्या नेतृत्वाखालील पीएमकेने मतदानात भाग घेणार नसल्याचे सांगितले.

सत्ताधारी टीव्हीकेकडे अध्यक्षांसह एकूण १०७ आमदार आहेत. उच्च न्यायालयाच्या निर्णयानंतर पक्षाचे तिरुपत्तूरचे आमदार आर. श्रीनिवासन सेतुपती यांना मतदान करता आले नाही. सत्ताधारी पक्षाला काँग्रेसच्या पाच आमदारांचा पाठिंबा आहे.

याव्यतिरिक्त, प्रत्येकी दोन आमदार असलेल्या सीपीआय, सीपीआय(एम), व्हीसीके आणि आययूएमएलने टीव्हीकेच्या पहिल्या सरकारला बाहेरून पाठिंबा जाहीर केला आहे. याशिवाय, एआयएडीएमकेच्या आमदारांच्या एका गटानेही सरकारला पाठिंबा दिला. या आमदारांपैकी सुमारे ३० आमदार ज्येष्ठ नेते एस. पी. वेलुमणी आणि सी. व्ही. षण्मुगम यांच्या नेतृत्वाखाली असून ते पक्षप्रमुख के. पलानीस्वामी यांच्या विरोधात आहेत.

पलानीस्वामी यांच्याशी निष्ठावंत असलेल्या एआयएडीएमके आमदारांनी सरकारच्या विरोधात मतदान करणार असल्याचे सांगितले आणि या आदेशाचे उल्लंघन करणाऱ्या पक्षाच्या आमदारांना पक्षांतरबंदी कायदा लागू होईल, असा इशारा दिला.

---------------

हिंदुस्थान समाचार / वृषाली देशपांडे