चेन्नई, 13 मे (हिं.स.)तामिळनाडूचे मुख्यमंत्री जोसेफ विजय यांचे ज्योतिषी थिरू रिकी राधन यांच्या नियुक्तीचा आदेश रद्द करण्यात आला आहे. थिरू रिकी राधन पंडित यांची मुख्यमंत्र्यांचे विशेष कार्य अधिकारी (ओएसडी) म्हणून नियुक्ती करण्यात आली होती. राधन पंडित यांनी तामिळनाडू निवडणुकीपूर्वी विजय यांच्या विजयाचे आणि सरकार स्थापनेचे भाकीत केले होते. राधन पंडित यांचे भाकीत खरे ठरले आणि तामिळनाडू विधानसभा निवडणुकीत विजय यांच्या टीव्हीके पक्षाने १०८ जागा जिंकल्या होत्या.

मुख्यमंत्री कार्यालयात राधन यांची विशेष कार्य अधिकारी (ओएसडी) आणि राजकीय विभागाचे सचिव म्हणून झालेली नियुक्ती वादाला कारणीभूत ठरली होती. विरोधी पक्ष आणि विजय सरकारला पाठिंबा देणाऱ्या पक्षांनीही यावर टीका केली होती. विरोधी पक्षांनी उपस्थित केलेल्या काही मुद्द्यांवर पुनर्विचार करणार असल्याचे मुख्यमंत्र्यांनी विधानसभेत सांगितले होते. या वक्तव्यानंतर, राधन पंडित यांच्या नियुक्तीचा आढावा घेऊन ती रद्द करण्यात आली.

हा वाद स्वतः ज्योतिषाबद्दल कमी आणि त्याला नेमण्यात आलेल्या पदाबद्दल अधिक आहे. टीकाकारांनी असा प्रश्न उपस्थित केला आहे की, ज्योतिषी म्हणून सार्वजनिकरित्या ओळखल्या जाणाऱ्या व्यक्तीला मुख्यमंत्री कार्यालयात अधिकृत सरकारी पदाची काय गरज आहे, विशेषतः तामिळनाडूसारख्या राज्यात, जिथे द्रविड राजकारणाने ऐतिहासिकदृष्ट्या विवेकवाद आणि वैज्ञानिक विचारांना प्रोत्साहन दिले आहे.

---------------

हिंदुस्थान समाचार / वृषाली देशपांडे