अमरावती, 16 मे (हिं.स.) : शासनाच्या सोलर पंप योजनेचा लाभ मिळवून देण्याचे आमिष दाखवून नांदगावखंडेश्वर तालुक्यातील 14 शेतकऱ्यांची तब्बल 4 लाख 702 रुपयांची फसवणूक झाल्याचा प्रकार समोर आला आहे. या घटनेमुळे ग्रामीण भागात शासकीय योजनांच्या नावाखाली होणाऱ्या आर्थिक फसवणुकीबाबत चिंता व्यक्त केली जात आहे.

नांदगावखंडेश्वर पोलीस यांनी सूरज सुभाषराव आडकिने यांच्या तक्रारीवरून संशयित सुनील विश्वेश्वर टाके (रा. मलकापूर, जि. बुलडाणा) याच्याविरुद्ध फसवणूक आणि विश्वासघाताचा गुन्हा दाखल केला आहे.

तक्रारीनुसार, शासनाच्या “मागेल त्याला सोलर” योजनेअंतर्गत शेतकऱ्यांना जास्त एचपीचे सोलर पंप मंजूर करून देण्याचे आश्वासन देत आरोपीने शेतकऱ्यांकडून रोख रक्कम व ऑनलाइन व्यवहाराद्वारे पैसे घेतले. मात्र, कोणत्याही शेतकऱ्याला योजनेचा लाभ मिळाला नाही.

या प्रकरणात अनेक शेतकरी आर्थिक फसवणुकीचे बळी ठरले असून, पोलिसांनी नागरिकांना सतर्क राहण्याचे आवाहन केले आहे. कोणतीही शासकीय योजना अधिकृत संकेतस्थळ, शासकीय कार्यालय किंवा अधिकृत प्रतिनिधीमार्फतच तपासून घ्यावी, असे आवाहन करण्यात आले आहे.

किरण वानखडे यांनी सांगितले की, “शासकीय योजनांच्या नावाखाली फसवणूक करणाऱ्यांपासून शेतकऱ्यांनी सावध राहावे. ज्यांची फसवणूक झाली आहे त्यांनी तातडीने पोलिसांशी संपर्क साधावा.”

जनजागृतीची गरज

ग्रामीण भागात ऑनलाइन योजना, अनुदान आणि सबसिडीच्या नावाखाली अनेक फसवणुकीचे प्रकार वाढत आहेत. त्यामुळे कोणतीही रक्कम भरण्यापूर्वी संबंधित योजनेची अधिकृत माहिती पडताळणे आवश्यक आहे. प्रशासन आणि पोलिसांनीही अशा प्रकारांविरोधात जनजागृती मोहिमा राबविण्याची गरज व्यक्त होत आहे.

----------------------------

हिंदुस्थान समाचार / अरुण जोशी