मुंबई, 07 मे (हिं.स.)। प्रियांका चोप्राच्या हाती आणखी एक मोठा हॉलिवूड प्रकल्प लागला आहे. ती लवकरच 'सर्व्हायव्हल थ्रिलर' प्रकारातील 'रिसेट' या चित्रपटात दिसणार आहे; ज्यामध्ये ती हॉलिवूडचा प्रसिद्ध अभिनेता ऑरलँडो ब्लूम याच्यासोबत मुख्य भूमिकेत असेल. या नवीन जोडीबद्दल चाहत्यांमध्ये प्रचंड उत्साह दिसून येत आहे. या चित्रपटाचे दिग्दर्शन मॅट स्मकलर करणार असून, याचे चित्रीकरण ऑगस्ट २०२६ मध्ये सुरू होण्याचे नियोजित आहे.

मिळालेल्या माहितीनुसार, या चित्रपटाची कथा एका अशा महिलेभोवती गुंफलेली आहे, जी एका निर्जन आणि ओसाड प्रदेशात अडकून पडते. ती तिथे कशी पोहोचली, हे तिला स्वतःलाही आठवत नाही. आपला जीव वाचवण्यासाठी तिला एका रहस्यमय अनोळखी व्यक्तीवर विश्वास ठेवणे भाग पडते.हीच भूमिका ऑरलँडो साकारणार आहे. दिग्दर्शकाच्या मते, प्रियांका आणि ऑरलँडो यांची जोडी 'मोहकता आणि रहस्य' यांचा एक परिपूर्ण समतोल साधते; ज्यामुळे चित्रपटाच्या कथानकाचा प्रभाव अधिकच वाढेल.

या चित्रपटाचे एक विशेष वैशिष्ट्य म्हणजे, प्रियांका यात केवळ एक अभिनेत्री म्हणूनच नव्हे, तर निर्मिती क्षेत्रातही सहभागी आहे. तिची निर्मिती संस्था 'पर्पल पेबल पिक्चर्स' आणि ऑरलँडोची कंपनी 'अमेजिंग आऊल' या प्रकल्पाची संयुक्त निर्मिती करत आहेत. जॉन होबर, एरिक होबर, मायकल लाझारोविच आणि मॅथ्यू रोड्स हे देखील या चित्रपटाचे निर्माते म्हणून काम पाहत आहेत.

हॉलिवूडमध्ये प्रियांका चोप्राचे स्थान आणि प्रतिष्ठा सातत्याने उंचावत आहे. तिच्या अलीकडील प्रकल्पांना जागतिक स्तरावर प्रेक्षकांचा उत्कृष्ट प्रतिसाद लाभला आहे. लवकरच ती तिच्या गाजलेल्या सिटाडेल या मालिकेच्या दुसऱ्या पर्वात, तसेच एस.एस. राजामौली यांच्या वाराणसी या चित्रपटातही दिसणार आहे.

---------------

हिंदुस्थान समाचार / हर्षदा गावकर