हैदरबाद, 07 मे (हिं.स.)आयपीएल २०२६ च्या हंगामात, पंजाब किंग्स सलग सहा विजयांसह गुणतालिकेत अव्वल स्थानी होता. पण, राजस्थान रॉयल्सने त्यांची विजयी मालिका खंडित केल्यामुळे श्रेयस अय्यरच्या संघाला सलग तिसऱ्या पराभवाला सामोरे जावे लागले. २८ एप्रिलपासून, संघाने तीन सामने खेळले असून त्यांना अद्याप विजय मिळवता आलेला नाही. सनरायझर्स हैदराबादने, पंजाबच्या घरच्या मैदानावर झालेल्या खराब क्षेत्ररक्षणाचा (तीन झेल सोडल्याचा) फायदा घेत, प्रथम फलंदाजी करताना २३५ धावांचा डोंगर उभा केला. जीवदान मिळाल्यानंतर हेनरिक क्लासेनने ६९ धावा केल्या, तर दोन झेल सोडल्यानंतर इशान किशनने ५५ धावा केल्या. हे सोडलेले झेल पंजाबसाठी महागडे ठरले, ज्यामुळे त्यांना ३३ धावांनी पराभव सहन लागला. या पराभवामुळे पंजाबने अव्वल स्थान गमावले, तर हैदराबादने आपला सातवा विजय मिळवून १४ गुणांसह पुन्हा अव्वल स्थान पटकावले.

सनरायझर्स हैदराबादचा कर्णधार पॅट कमिन्स नाणेफेक हरल्यामुळे पंजाबने प्रथम गोलंदाजी करण्याचा निर्णय घेतला. आपल्या घरच्या मैदानावर, अभिषेक शर्मा आणि ट्रॅव्हिस हेड यांनी अवघ्या ३.३ षटकांत ५४ धावा जोडून संघाला वेगवान सुरुवात करून दिली. पण अभिषेक शर्मा चार षटकार आणि दोन चौकारांसह १३ चेंडूंत ३५ धावा करून बाद झाला. ट्रॅव्हिस हेडही फार काळ टिकू शकला नाही, त्याने तीन षटकार आणि तीन चौकारांसह १९ चेंडूंत ३८ धावा केल्या. हैदराबादची अवस्था ८४ धावांवर दोन गडी बाद अशी झाली, त्यानंतर हेनरिक क्लासेन आणि इशान किशन यांनी डाव सावरला.

८४ धावांवर दोन गडी गमावल्यानंतर, ९ धावांवर असताना शशांक सिंगने सोपा झेल सोडल्याने हेनरिक क्लासेनला नशिबाची साथ मिळाली. इशान किशनलाही कूपर कॉनॉलीने ९ धावांवर आणि लॉकी फर्ग्युसनने १८ धावांवर जीवदान दिले. पंजाबच्या खराब क्षेत्ररक्षणाचा हैदराबादने फायदा उचलला. त्यानंतर क्लासेनने तीन चौकार आणि चार षटकारांच्या मदतीने ४३ चेंडूंमध्ये ६९ धावा केल्या, तर इशान किशनने दोन चौकार आणि चार षटकारांच्या मदतीने ३२ चेंडूंमध्ये ५५ धावा केल्या. या खेळींमुळे हैदराबादने २० षटकांत चार गडी गमावून २३५ धावांची भक्कम धावसंख्या उभारली. पंजाबकडून अर्शदीप सिंग, लॉकी फर्ग्युसन, युझवेंद्र चहल आणि वैशाक यांनी प्रत्येकी एक बळी घेतला.

२३६ धावांचे लक्ष्य गाठताना पंजाब किंग्सची सुरुवात खराब झाली. सलामीवीर प्रियांश आर्य (१) आणि प्रभसिमरन सिंग (३) स्वस्तात बाद झाले, त्यामुळे संघाची धावसंख्या ४ धावांवर राहिली. श्रेयस अय्यरही फारसा प्रभाव पाडू शकला नाही आणि तो ५ धावांवर मलिंगाच्या गोलंदाजीवर बाद झाला. कूपर कॉनॉलीने एक बाजू सांभाळण्याचा प्रयत्न केला, पण दुसऱ्या बाजूला मार्कस स्टोइनिस (२८), सूर्यांश शेडगे (२५) आणि शशांक सिंग (४) झटपट बाद झाले. पंजाबने ११९ धावांत सहा गडी गमावले आणि त्यांचा पराभव जवळपास निश्चित झाला होता. त्यानंतर कूपर कॉनॉलीने आपले पहिले आयपीएल शतक झळकावले, पण तो आपल्या संघाला विजय मिळवून देऊ शकला नाही. कॉनॉलीच्या ५९ चेंडूंतील सात चौकार आणि आठ षटकारांच्या नाबाद १०७ धावांच्या खेळीमुळे पंजाबची धावसंख्या २० षटकांत सात गडी बाद २०२ झाली आणि त्यांना ३३ धावांनी सलग तिसरा पराभव पत्करावा लागला. हैदराबादकडून पॅट कमिन्स आणि शिवांग कुमार यांनी प्रत्येकी दोन बळी घेतले.

---------------

हिंदुस्थान समाचार / वृषाली देशपांडे