मुंबई, 15 जुलै (हिं.स.)। भारतीय स्मार्टफोन बाजारात मोटोरोला आणि रिअलमी या दोन्ही कंपन्यांनी आपल्या नव्या स्मार्टफोनची घोषणा केली असून ग्राहकांसाठी प्रीमियम तसेच मध्यम बजेटमधील पर्याय उपलब्ध केले आहेत. मोटोरोलाने एज ७० मालिकेतील पाचवा स्मार्टफोन मोटोरोला एज ७० मॅक्स बाजारात आणला आहे, तर रिअलमीने आपल्या नार्झो मालिकेत रिअलमी नार्झो १००एक्स ५जी हा नवा स्मार्टफोन सादर केला आहे. दोन्ही फोनमध्ये मोठी बॅटरी, उच्च रिफ्रेश रेटचा डिस्प्ले आणि आधुनिक फीचर्स देण्यात आले आहेत.

मोटोरोला एज ७० मॅक्समध्ये ६.८ इंचांचा क्यूएचडी प्लस एक्स्ट्रीम अॅमोलेड डिस्प्ले असून तो १४४ हर्ट्झ रिफ्रेश रेट आणि तब्बल ७ हजार निट्स पीक ब्राइटनेसला सपोर्ट करतो. या स्मार्टफोनमध्ये क्वालकॉमचा स्नॅपड्रॅगन ८ जनरेशन ५ प्रोसेसर देण्यात आला असून १२ जीबीपर्यंत एलपीडीडीआर५एक्स रॅम आणि २५६ जीबी यूएफएस ४.१ स्टोरेजचा पर्याय उपलब्ध आहे. हा फोन अँड्रॉइड १६ आधारित हेलो यूआयवर चालतो. कंपनीकडून तीन वर्षांचे ओएस अपडेट आणि पाच वर्षांचे सिक्युरिटी अपडेट देण्याचे आश्वासन देण्यात आले आहे.

कॅमेऱ्याच्या बाबतीत या फोनमध्ये ५० मेगापिक्सेलचा सोनी एलवायटी-७१० प्रायमरी सेन्सर आणि ८ मेगापिक्सेलचा अल्ट्रावाइड कॅमेरा देण्यात आला आहे. सेल्फीसाठी ३२ मेगापिक्सेलचा फ्रंट कॅमेरा असून ४के ६० एफपीएस व्हिडीओ रेकॉर्डिंगची सुविधा मिळते. ७१०० एमएएच बॅटरीसह ९० वॅट वायर्ड आणि २५ वॅट वायरलेस फास्ट चार्जिंगची सुविधा देण्यात आली आहे. या फोनची सुरुवातीची किंमत ५४ हजार ९९९ रुपये असून २० जुलैपासून फ्लिपकार्ट आणि मोटोरोलाच्या ऑनलाईन स्टोअरवर विक्री सुरू होणार आहे.

दुसरीकडे, रिअलमी नार्झो १००एक्स ५जी हा कमी बजेटमधील ग्राहकांना लक्षात घेऊन सादर करण्यात आला आहे. या फोनमध्ये ६.८ इंचांचा एचडी प्लस एलसीडी डिस्प्ले असून १४४ हर्ट्झ रिफ्रेश रेट आणि १२०० निट्स पीक ब्राइटनेस देण्यात आला आहे. मीडियाटेक डायमेन्सिटी ६३०० प्रोसेसर, ६ जीबीपर्यंत रॅम आणि २५६ जीबीपर्यंत यूएफएस २.२ स्टोरेजची सुविधा यात उपलब्ध आहे. दीर्घकाळ गेमिंगदरम्यान फोन थंड राहावा यासाठी व्हेपर चेंबर कूलिंग सिस्टिमही देण्यात आली आहे.

या फोनमध्ये ५० मेगापिक्सेलचा प्रायमरी कॅमेरा, ८ मेगापिक्सेलचा फ्रंट कॅमेरा तसेच एआय आधारित कॅमेरा फीचर्स देण्यात आले आहेत. ८००० एमएएच क्षमतेची मोठी बॅटरी आणि ४५ वॅट फास्ट चार्जिंगमुळे हा फोन दीर्घकाळ वापरता येणार असल्याचा कंपनीचा दावा आहे. आयपी६५ रेटिंग आणि मिलिटरी ग्रेड टिकाऊपणाची सुविधाही यात देण्यात आली आहे. या स्मार्टफोनची सुरुवातीची किंमत २० हजार ९९९ रुपये असून २२ जुलैपासून रिअलमीच्या संकेतस्थळावर आणि अॅमेझॉनवर विक्री सुरू होणार आहे. दोन्ही कंपन्यांनी आपल्या नव्या स्मार्टफोनमधून ग्राहकांना आधुनिक तंत्रज्ञान, दमदार परफॉर्मन्स आणि अधिक बॅटरी बॅकअप देण्यावर भर दिला आहे.

---------------

हिंदुस्थान समाचार / Suraj Chaugule