नवी दिल्ली, 15 जुलै (हिं.स.)। आठवड्याच्या सुरुवातीला झालेल्या घसरणीनंतर देशांतर्गत शेअर बाजाराने बुधवारी दमदार पुनरागमन करत हिरव्या चिन्हात व्यवहाराची सांगता केली. दिवसभर चढ-उतार अनुभवूनही शेवटच्या टप्प्यात झालेल्या जोरदार खरेदीमुळे बाजाराला आधार मिळाला. परिणामी, सेन्सेक्स आणि निफ्टी या दोन्ही प्रमुख निर्देशांकांनी वाढीसह व्यवहार बंद केले. बाजारातील या तेजीमुळे गुंतवणूकदारांच्या संपत्तीत सुमारे ३.३७ लाख कोटी रुपयांची भर पडली.
बीएसईचा सेन्सेक्स १३७.८२ अंकांच्या वाढीसह ७७,१९२.७६ अंकांवर उघडला. सुरुवातीच्या व्यवहारात गुंतवणूकदारांनी मोठ्या प्रमाणावर खरेदी केल्याने सेन्सेक्सने ७७,६४६.२७ अंकांचा उच्चांक गाठला. मात्र दुपारी एकच्या सुमारास अचानक विक्रीचा दबाव वाढल्याने निर्देशांक घसरून काही काळ लाल चिन्हात गेला. त्यानंतर पुन्हा खरेदी वाढल्यामुळे सेन्सेक्सने वेगाने सावरत १३०.४९ अंकांच्या वाढीसह ७७,१८५.४३ अंकांवर दिवसअखेर व्यवहार बंद केला.
एनएसईचा निफ्टीही ३३.८० अंकांच्या वाढीसह २४,०८५.८५ अंकांवर उघडला. सुरुवातीच्या व्यवहारात निफ्टीने २४,२२०.३५ अंकांचा उच्च स्तर गाठला. मात्र दुपारनंतर झालेल्या जोरदार विक्रीमुळे तो २४,०१०.५५ अंकांपर्यंत घसरला. त्यानंतर खरेदीदार पुन्हा सक्रिय झाल्याने निफ्टीने तेजी मिळवत २६.४५ अंकांच्या वाढीसह २४,०७८.५० अंकांवर व्यवहार संपवला.
दिवसभराच्या व्यवहारात बँकिंग, फार्मास्युटिकल आणि कॅपिटल गुड्स क्षेत्रातील शेअर्समध्ये सातत्याने खरेदी दिसून आली. याशिवाय कन्झ्युमर ड्युरेबल्स, ऑईल अँड गॅस आणि ऑटोमोबाईल क्षेत्रातील शेअर्समध्येही तेजी कायम राहिली. दुसरीकडे पब्लिक सेक्टर एंटरप्रायझेस, मेटल, एफएमसीजी आणि आयटी क्षेत्रातील शेअर्सवर विक्रीचा दबाव राहिला. ब्रॉडर मार्केटमध्येही सकारात्मक वातावरण दिसून आले. मिडकॅप इंडेक्स ०.२८ टक्क्यांनी, तर स्मॉलकॅप इंडेक्स ०.६७ टक्क्यांनी वधारून बंद झाला.
आजच्या तेजीमुळे बीएसईमध्ये सूचीबद्ध कंपन्यांचे एकूण मार्केट कॅपिटलायझेशन ४८२.४० लाख कोटी रुपयांवर पोहोचले. मागील व्यवहारात हे मूल्य ४७९.०३ लाख कोटी रुपये होते. त्यामुळे एका दिवसात गुंतवणूकदारांच्या संपत्तीत सुमारे ३.३७ लाख कोटी रुपयांची वाढ झाली.
दिवसभरातील व्यवहारात एटरनल, अल्ट्राटेक सिमेंट, एचडीएफसी लाइफ, श्रीराम फायनान्स आणि आयशर मोटर्स हे शेअर्स सर्वाधिक वाढ नोंदवणाऱ्यांमध्ये राहिले. तर पॉवर ग्रिड कॉर्पोरेशन, हिंडाल्को इंडस्ट्रीज, लार्सन अँड टुब्रो, जेएसडब्ल्यू स्टील आणि टाटा स्टील यांच्या शेअर्समध्ये सर्वाधिक घसरण नोंदवली गेली. एकूणच दिवसातील चढ-उतारांनंतरही शेअर बाजाराने मजबूत पुनरागमन करत गुंतवणूकदारांचा आत्मविश्वास कायम असल्याचे चित्र स्पष्ट केले.
---------------
हिंदुस्थान समाचार / Suraj Chaugule
