इस्लामाबाद, 25 जुलै (हिं.स.)। पाकिस्तानच्या खैबर पख्तूनख्वा प्रांतातील टँक जिल्ह्यातील संयुक्त पोलिस तपासणी नाक्यावर झालेल्या दहशतवादी हल्ल्यात 14 सुरक्षाकर्म्यांसह 15 जणांचा मृत्यू झाला. पाकिस्तान लष्कराच्या मीडिया विंग इंटर-सर्व्हिसेस पब्लिक रिलेशन्स (आयएसपीआर) यांच्या माहितीनुसार, सुरक्षा दलांनी प्रत्युत्तरात्मक कारवाईत 12 दहशतवाद्यांना ठार केले.

आयएसपीआरच्या हवाल्याने माध्यमांनी दिलेल्या वृत्तानुसार, 23 आणि 24 जुलैच्या मध्यरात्री दहशतवाद्यांनी तपासणी नाक्यावरील सुरक्षा घेरा भेदण्याचा प्रयत्न केला, मात्र सुरक्षा दलांनी तात्काळ कारवाई करून त्यांचा प्रयत्न हाणून पाडला. त्यानंतर पळून जाणाऱ्या दहशतवाद्यांचा पाठलाग करत 12 हल्लेखोरांना ठार करण्यात आले. लष्कराने सांगितले की, हल्ला अयशस्वी ठरल्यानंतर दहशतवाद्यांनी स्फोटकांनी भरलेले वाहन तपासणी नाक्याच्या बाहेरील भिंतीवर आदळवले. या भीषण स्फोटात तपासणी नाक्याचे मोठे नुकसान झाले आणि 15 जणांचा मृत्यू झाला. मृतांमध्ये लष्कराचे 12 जवान, दोन पोलिस कर्मचारी आणि वन विभागातील एक माजी सरकारी अधिकारी यांचा समावेश आहे.

आयएसपीआरने सांगितले की, परिसरात लपून बसलेल्या उर्वरित दहशतवाद्यांचा शोध घेण्यासाठी सॅनिटायझेशन ऑपरेशन सुरू आहे. देशातील दहशतवादाचे संकट पूर्णपणे संपवण्यासाठी सुरक्षा दल आणि कायदा अंमलबजावणी यंत्रणा दहशतवादविरोधी मोहीम सातत्याने सुरू ठेवतील, असा पुनरुच्चार लष्कराने केला. हल्ल्यानंतर पाकिस्तानचे राष्ट्रपती आसिफ अली झरदारी आणि पंतप्रधान शहबाज शरीफ यांनी या घटनेचा तीव्र निषेध केला. दोन्ही नेत्यांनी शहीद सुरक्षाकर्म्यांना श्रद्धांजली वाहिली आणि कारवाईत 12 दहशतवाद्यांना ठार केल्याबद्दल सुरक्षा दलांचे कौतुक केले.

2021 मध्ये अफगाणिस्तानात तालिबान पुन्हा सत्तेवर आल्यानंतर पाकिस्तानमध्ये, विशेषतः खैबर पख्तूनख्वा आणि बलुचिस्तान प्रांतांत, दहशतवादी घटनांमध्ये लक्षणीय वाढ झाली आहे. याच पार्श्वभूमीवर पाकिस्तान सरकार दहशतवादाविरोधात सातत्याने मोहीम राबवत आहे.

---------------

हिंदुस्थान समाचार / Suraj Chaugule