मुंबई, 25 जुलै, (हिं.स.)। अभिनेता यशने नितेश तिवारी यांच्या बहुप्रतिक्षित 'रामायण' चित्रपटातील रावणाच्या भूमिकेला आपल्या कारकिर्दीतील सर्वात आव्हानात्मक भूमिकांपैकी एक असल्याचे म्हटले आहे.

सॅन डिएगो कॉमिक-कॉनमध्ये चित्रपटाच्या टीमसोबत बोलताना यशने नमूद केले की, रामायण ही केवळ चांगल्या आणि वाईट शक्तींमधील लढाईची कथा नाही, तर ती दोन भिन्न विचारसरणी आणि जीवनप्रवासांचे चित्रण आहे. त्याच्या मते, प्रभू श्रीराम आणि रावण यांच्या जीवनप्रवासातील हा विरोधाभासच या महाकाव्याला पिढ्यानपिढ्या सुसंगत आणि महत्त्वपूर्ण ठरवतो.

यशने नमूद केले की, प्रभू श्रीरामांनी आपली सर्व ध्येये आदर्श, संयम आणि सत्कर्मांच्या जोरावर साध्य केली; याउलट, अफाट शक्ती आणि ज्ञान असूनही, अहंकार आणि सूडाच्या भावनेमुळे रावणाचा स्वतःचा विनाश ओढवला. त्याने निरीक्षण नोंदवले की, जेव्हा तुम्ही एखाद्या राक्षसाशी लढता, तेव्हा तुम्ही स्वतःच त्याहून मोठा राक्षस बनणार नाही याची काळजी घेणे आवश्यक असते.

यशच्या मते, रावण हा काही सामान्य खलनायक नव्हता; तो एक विद्वान, शक्तिशाली व्यक्तिमत्त्व आणि विविध कलांमध्ये पारंगत असलेला व्यक्ती होता. मात्र, त्याला आपली शक्ती आणि अहंकार यांवर नियंत्रण ठेवता आले नाही, ज्यामुळे अखेरीस त्याचा विनाश झाला.

यशने सांगितले की, त्याचे बालपणापासूनच रामायणाशी नाते राहिले आहे. त्याने आठवण सांगितली की, त्याचे आजोबा त्याला या महाकाव्यातील कथा सांगत असत, ज्यामुळे त्याच्या कल्पनेत एक वेगळेच जग निर्माण होत असे. रावणाच्या भूमिकेच्या तयारीबाबत बोलताना त्याने स्पष्ट केले की, त्याचे उद्दिष्ट या पात्राची नव्याने निर्मिती करणे हे नव्हते, तर त्या पात्राची मानसिकता आणि त्याच्या निर्णयामागील हेतू समजून घेणे हे होते. त्याने दिग्दर्शक नितेश तिवारी आणि लेखकांचे कौतुक केले आणि रावणाचे पात्र सखोलपणे समजून घेण्यास त्यांनी दिलेल्या महत्त्वपूर्ण योगदानाची दखल घेतली.

---------------

हिंदुस्थान समाचार / हर्षदा गावकर