मस्कत, (ओमान), 26 जुलै (हिं.स.) भारताच्या सब-ज्युनियर पुरुष संघाने पाकिस्तानला ३-१ ने पराभूत करत एफआयएच युथ हॉकी फाईव्ह्स आशियाई चॅम्पियनशिप जिंकली. अंतिम सामन्यात भारताने कट्टर प्रतिस्पर्धी पाकिस्तानला ३-१ ने हरवले. रोमित पाल (५ व्या मिनिटाला), कर्णधार केतन कुशवाहा (१२ व्या मिनिटाला) आणि शाहरुख अली (१३ व्या मिनिटाला) यांच्या गोलांनी भारताचे आशियाई विजेतेपद निश्चित केले. या विजयामुळे भारतीय पुरुष संघ एलिट पूलच्या गुणतालिकेत अव्वल स्थानावर पोहोचला आहे.

अचूक पासिंग आणि शिस्तबद्ध रणनीतीच्या जोरावर भारताने अंतिम सामन्यात सुरुवातीलाच आघाडी घेतली. पहिल्या हाफमध्ये रोमित पालने पाकिस्तानी गोलरक्षकाला चकवून पहिला गोल केला, ज्यामुळे मध्यंतरापर्यंत भारताला १-० अशी आघाडी मिळाली. दुसऱ्या हाफच्या सुरुवातीला कर्णधार केतन कुशवाहाने (१२ व्या मिनिटाला) आणखी एक गोल करून भारताला मजबूत स्थितीत आणले. त्यानंतर लगेचच शाहरुख अलीने आणखी एक गोल करून ३-० अशी आघाडी मिळवून दिली. मोहम्मद उस्मानने १६ व्या मिनिटाला केलेल्या गोलमुळे पाकिस्तानने पिछाडी कमी केली, परंतु भारतीय बचावफळीने शेवटच्या मिनिटांमध्ये भक्कम बचाव करत पुढील गोल होऊ दिले नाहीत.

अंतिम फेरीत पोहोचल्यामुळे भारत आणि पाकिस्तान या दोन्ही संघांनी एफआयएच युथ हॉकी फाईव्ह्स विश्वचषकासाठी आधीच पात्रता मिळवली आहे. महिलांच्या गटात, भारतीय संघाला विजेतेपद गमवावे लागले आणि त्यांना रौप्य पदकावर समाधान मानावे लागले. अंतिम सामन्यात भारताला चीनकडून २-४ असा पराभव पत्करावा लागला.

एफआयएच युथ हॉकी फाईव्ह्स आशियाई चॅम्पियनशिपमधील प्रभावी कामगिरीनंतर भारतीय पुरुष आणि महिला संघांवर बक्षिसांचा वर्षाव झाला आहे. हॉकी इंडियाने सुवर्णपदक विजेत्या भारतीय पुरुष संघातील प्रत्येक खेळाडूला ₹२,००,००० आणि प्रत्येक सपोर्ट स्टाफ सदस्याला ₹१,००,००० चे बक्षीस जाहीर केले, तर रौप्यपदक विजेत्या भारतीय महिला संघाला प्रत्येक खेळाडूला ₹१,००,००० आणि प्रत्येक सपोर्ट स्टाफ सदस्याला ₹५०,००० मिळाले.

---------------

हिंदुस्थान समाचार / वृषाली देशपांडे