नवी दिल्ली, 12 ऑगस्ट (हिं.स.)। बटाटा-कांद्यासारख्या खाद्यपदार्थांच्या किमती वाढल्यामुळे किरकोळ महागाई दरात सलग चौथ्या महिन्यात वाढ नोंदवली गेली आहे. जुलैमध्ये किरकोळ महागाई दर वाढून 4.45 टक्क्यांवर पोहोचला आहे.

सांख्यिकी आणि कार्यक्रम अंमलबजावणी मंत्रालयाच्या म्हणण्यानुसार, खाद्यपदार्थांच्या किमतींमध्ये वाढ झाल्यामुळे ग्राहक मूल्य निर्देशांक (सीपीआय) आधारित किरकोळ महागाई दर जुलैमध्ये किंचित वाढून 4.45 टक्क्यांवर पोहोचला आहे. यापूर्वीच्या जून महिन्यात तो 4.38 टक्क्यांच्या पातळीवर होता. आकडेवारीनुसार, जुलैमध्ये खाद्य महागाई वाढून 5.52 टक्के झाली, जी यापूर्वीच्या महिन्यात 5.32 टक्के होती. मंत्रालयाने सांगितले की, खाद्यपदार्थांच्या किमतींमध्ये झालेली वाढ हे यामागील प्रमुख कारण होते. जुलैच्या किरकोळ महागाई दराचा हा आकडा नव्या सीपीआय मालिकेवर आधारित आहे, ज्यामध्ये 2024 हे आधार वर्ष मानण्यात आले आहे.

एनएसओनुसार, ग्रामीण भारतात एकूण किरकोळ महागाई जुलैमध्ये 4.84 टक्के राहिली, तर जूनमध्ये ती 4.74 टक्के होती. शहरांमध्ये महागाई 3.93 टक्क्यांवरून किंचित वाढून 3.96 टक्के झाली. खाद्यपदार्थांव्यतिरिक्त कपडे आणि पादत्राणेदेखील ग्रामीण भागात अधिक महाग झाली आहेत. ग्रामीण भागात त्यांची महागाई दर 3.97 टक्के राहिला, तर शहरी भागात तो 2.41 टक्के होता.

भारतीय रिझर्व्ह बँकेला (आरबीआय) किरकोळ महागाई दर दोन टक्के घट-बढीसह चार टक्क्यांवर ठेवण्याची जबाबदारी देण्यात आली आहे. आरबीआयने या महिन्याच्या सुरुवातीला महागाईशी संबंधित चिंतेचा हवाला देत धोरणात्मक दर रेपो रेट 5.1 टक्क्यांवर कायम ठेवला होता. आरबीआयने आर्थिक वर्ष 2026-27 साठी महागाईचा अंदाज 5.1 टक्क्यांवरून कमी करून 5 टक्के केला आहे.

---------------

हिंदुस्थान समाचार / Suraj Chaugule