रत्नागिरी, 26 ऑगस्ट (हिं.स.) । हजरत महम्मद पैगंबर यांच्या जयंतीचे औचित्य साधून रत्नागिरी शहरात ईद-ए-मिलादुन्नबीचा सण अत्यंत धार्मिक, पवित्र आणि उत्साही वातावरणात साजरा करण्यात आला. रत्नागिरी शहरातून दोन वेगवेगळ्या ठिकाणांवरून अतिशय शिस्तबद्ध, भव्य आणि देखण्या मिरवणुका (जुलूस) काढण्यात आल्या. या दोन्ही मिरवणुकांमध्ये मुस्लिम बांधवांचा ओसंडून वाहणारा उत्साह संपूर्ण शहराला पाहायला मिळाला. मिरवणूक मार्गावर निर्माण झालेल्या धार्मिक आणि भक्तिमय वातावरणामुळे संपूर्ण शहर दुमदुमून गेले होते.

या दोन्ही भव्य मिरवणुकांमध्ये आबालवृद्धांनी मोठ्या संख्येने हजेरी लावली होती. हातात फडकणारे पारंपरिक इस्लामी ध्वज, परिधान केलेला सुटसुटीत आणि नेटका पारंपरिक पोशाख अन् चेहऱ्यावर सणाचा स्पष्ट झळकणारा आनंद अशा प्रसन्न वातावरणात नागरिक शिस्तबद्धपणे या मिरवणुकीत पुढे सरकत होते. दरम्यान, कायदा व सुव्यवस्था अबाधित राखण्यासाठी रत्नागिरी शहर पोलिसांनी संपूर्ण मिरवणूक मार्गावर चोख आणि कडक पोलीस बंदोबस्त तैनात केला होता. पोलिसांचे बारीक लक्ष आणि आयोजकांचे उत्कृष्ट नियोजन यामुळे दोन्ही मिरवणुका अतिशय शांततेत, सुरक्षिततेने आणि उत्साहात पार पडल्या. शहरात शांतता आणि धार्मिक सलोखा जपत सर्व नागरिक या आनंदोत्सवात सहभागी झाले होते.

---------------

हिंदुस्थान समाचार / रत्नागिरी