न्यूयॉर्क, २६ ऑगस्ट (हिं.स.)सेरेना विल्यम्स आणि कार्लोस अल्कारज यांनी यूएस ओपन २०२६ मधीलमिश्र दुहेरीच्या आपल्या मोहिमेची सुरुवात विजयाने केली होती. पण पुढच्याच सामन्यात बेलिंडा बेन्सिक आणि फ्लाविओ कोबोली यांच्याकडून पराभव स्वीकारावा लागल्याने या जोडीचे आव्हान संपुष्टात आले आहे.

विल्यम्स आणि अल्कारज यांनी त्यांच्या पहिल्या सामन्यात एरिन राउटलिफ आणि लॉईड ग्लासपूल यांचा ५-३, ४-१ असा पराभव केला होता. २०२२ नंतर अमेरिकन ओपनमधील सेरेनाचा हा पहिलाच सामना होता. विजयानंतर सेरेना म्हणाली की, कोर्टवर परतणे हा तिच्यासाठी एक खूप खास क्षण होता.

मात्र, त्यानंतर त्यांचा बेन्सिक आणि कोबोली यांच्याकडून ५-४ (४), ४-१ असा पराभव झाला. पहिल्या सेटचा टायब्रेक गमावल्यानंतर, अल्कारज आणि विल्यम्स यांना आपली लय कायम राखता आली नाही.

बेन्सिक आणि कोबोली आता उपांत्य फेरीत पती-पत्नी जोडी एलिना स्वितोलिना आणि गेल मॉनफिल्स यांच्याशी सामना करतील. स्वितोलिना आणि मॉनफिल्स यांनी कॅटेरिना सिनियाकोवा आणि हेन्री पॅटन यांचा ५-४ (६), ४-५ (३), १०-८ असा पराभव करून उपांत्य फेरीत प्रवेश केला. यापूर्वी सिनियाकोवा आणि पॅटन यांनी अव्वल मानांकित आर्यना सबालेन्का आणि नोव्हाक जोकोविच यांचा पराभव करून एक मोठा उलटफेर घडवला होता.

दुसऱ्या उपांत्य फेरीत मीरा आंद्रेयेवा आणि आंद्रे रुबलेव्ह यांचा सामना कॅरोलिना मुचोवा आणि याकूब मेंसिक यांच्याशी होईल. आंद्रेयेवा आणि रुबलेव्ह यांनी गतविजेत्या सारा एरानी आणि आंद्रेया वावासोरी, तसेच डायना श्नायडर आणि कॅस्पर रुड यांचा पराभव करून उपांत्य फेरीत प्रवेश केला.

---------------

हिंदुस्थान समाचार / वृषाली देशपांडे