नवी दिल्ली, २९ ऑगस्ट (हिं.स.) भारतीय ज्युनियर महिला हॉकी संघ एएचएफ महिला ज्युनियर आशिया कप २०२६ मध्ये सहभागी होण्यासाठी चीनमधील मोकी येथे रवाना झाला. ही स्पर्धा ४ ते १३ सप्टेंबर दरम्यान होणार आहे. मिडफिल्डर खैदेम शिलाईमा चानू १८ सदस्यीय भारतीय संघाचे नेतृत्व करेल.
नवनियुक्त मुख्य प्रशिक्षक टिम व्हाईट यांच्या मार्गदर्शनाखाली भारतीय संघाने स्पर्धेसाठी व्यापक तयारी केली आहे. या उन्हाळ्यात संघाने यूकेचा एक महत्त्वपूर्ण दौराही केला, जिथे त्यांना उच्च-स्तरीय संघांविरुद्ध खेळण्याचा अनुभव मिळाला.
५ ते १४ जुलै दरम्यान एडिनबर्ग आणि लिलेशॉल येथे झालेल्या यूके दौऱ्यात, भारताने स्कॉटलंडच्या वरिष्ठ महिला संघाविरुद्ध, तसेच अमेरिका, इंग्लंड आणि बेल्जियमच्या ज्युनियर संघांविरुद्ध एकूण सात सामने खेळले. भारताने अमेरिकेला ६-० ने पराभूत केले, तर इंग्लंडविरुद्ध २-० असे सलग दोन विजय नोंदवले. अमेरिकेविरुद्धचा आणखी एक सामना १-१ असा बरोबरीत सुटल्यानंतर, भारताने पेनल्टी शूटआऊटमध्ये ३-२ ने विजय मिळवला.
या दौऱ्यामुळे भारतीय संघाला स्कॉटलंडच्या अनुभवी वरिष्ठ संघाविरुद्ध आणि बेल्जियमच्या बलाढ्य २१ वर्षांखालील संघाविरुद्ध खेळण्याचा मौल्यवान अनुभवही मिळाला.
प्रवासाला निघण्यापूर्वी, मुख्य प्रशिक्षक टिम व्हाईट म्हणाले, आशिया कपसाठी चीनला जाण्यास संघ खूप उत्सुक आहे. आमची तयारी चांगली झाली आहे. आम्ही बंगळूरुमध्ये पाहुण्या भारतीय संघाविरुद्ध चार महत्त्वाचे सामनेही खेळलो आहोत. आम्हाला विश्वास आहे की आम्ही एक अशी रणनीती विकसित केली आहे, जी प्रतिस्पर्धी संघांसाठी कठीण असेल. आता आशियातील सर्वोत्तम संघांविरुद्ध तिची चाचणी घेण्यासाठी आम्ही उत्सुक आहोत.
भारताला यजमान चीन, जपान, कोरिया आणि मलेशिया यांच्यासोबत महिलांच्या एलिट पूलमध्ये स्थान देण्यात आले आहे. भारतीय संघ ५ सप्टेंबर रोजी कोरियाविरुद्ध आपल्या मोहिमेला सुरुवात करेल, त्यानंतर ६ सप्टेंबर रोजी मलेशिया, ८ सप्टेंबर रोजी जपान आणि ९ सप्टेंबर रोजी यजमान चीनविरुद्ध सामने होतील.
एलिट पूलमध्ये अव्वल स्थानासाठीचे सामने झाल्यानंतर, स्पर्धा नॉकआऊट टप्प्यात प्रवेश करेल. स्पर्धेतील सुवर्णपदकाचा सामना १३ सप्टेंबर रोजी खेळला जाईल. एएचएफ महिला ज्युनियर आशिया कप हे आशियातील अव्वल ज्युनियर हॉकी संघांसाठी एक महत्त्वाचे व्यासपीठ आहे, जे तरुण खेळाडूंना खंडातील सर्वात बलाढ्य संघांविरुद्ध आपले कौशल्य सिद्ध करण्याची संधी देते.
---------------
हिंदुस्थान समाचार / वृषाली देशपांडे
