जयपूर, 30 ऑगस्ट (हिं.स.)नॅशनल बोर्ड ऑफ मेडिकल सायन्सेस (NBEMS) ने राजस्थानमधील जयपूर येथील आयओएन डिजिटल झोन (सीतापुरा) केंद्रावरील नीट-पीजी २०२६ परीक्षा पुढे ढकलली आहे. आता या केंद्रावर प्रभावित झालेल्या उमेदवारांसाठी परीक्षा ५ सप्टेंबर रोजी घेतली जाईल. केंद्रावरील वीजपुरवठा खंडित झाल्यामुळे मंडळाने हा निर्णय घेतला.
विद्यार्थ्यांच्या म्हणण्यानुसार, परीक्षा सकाळी ९ वाजता सुरू होणार होती. परीक्षा सुरू झाल्यानंतर दोन तासांच्या आत, परीक्षेत अंदाजे १० वेळा व्यत्यय आला. वारंवार सिस्टीम बंद पडल्याने काही संगणक पुन्हा सुरू केल्यानंतर, स्क्रीनवर फक्त ३ ते ४ प्रश्न दिसत होते.
विद्यार्थ्यांचा आरोप आहे की, केंद्रावरील कर्मचाऱ्यांनी यासाठी कोणतेही तांत्रिक स्पष्टीकरण दिले नाही. यामुळे केंद्रावर आंदोलन झाले. गदारोळ वाढल्याने परीक्षा रद्द करण्यात आली. आता या केंद्रावर परीक्षा ५ सप्टेंबर रोजी पुन्हा आयोजित केली जाईल. परीक्षेला बसलेल्या विद्यार्थ्यांनी असा आरोप केला आहे की, त्यांनी परीक्षेदरम्यान अधिकाऱ्यांना बोलावण्याची वारंवार विनंती केली, पण कोणीही त्यांचे ऐकले नाही.
प्रभावित उमेदवारांसाठी फेरपरीक्षा ५ सप्टेंबर २०२६ रोजी दुपारी ३:०० वाजता फक्त राजस्थानमधील जयपूर येथे घेण्यात येईल. मंडळ लवकरच या उमेदवारांसाठी नवीन परीक्षा केंद्राबद्दल माहिती देईल. राष्ट्रीय परीक्षा मंडळाने हे प्रकरण गंभीरतेने घेतले असून, तांत्रिक भागीदाराची भूमिका आणि परीक्षा केंद्रावर पुरेशा पायाभूत सुविधा सुनिश्चित करण्यासाठी जबाबदार असलेल्या संस्थेचा आढावा घेण्यासाठी तातडीची बैठक बोलावण्याचा निर्णय घेतला आहे. मंडळाने म्हटले आहे की, चौकशीनंतर दोषी आढळलेल्यांवर योग्य कारवाई केली जाईल.
---------------
हिंदुस्थान समाचार / वृषाली देशपांडे
