बीड, 11 सप्टेंबर (हिं.स.)।पर्यावरण संवर्धनाचा संदेश देत अंबाजोगाई येथील खोलेश्वर महाविद्यालयात पर्यावरणपूरक गणपती निर्मिती कार्यशाळेचे आयोजन करण्यात आले. या कार्यशाळेत महाविद्यालयातील असंख्य युवक-युवतींनी उत्स्फूर्त सहभाग नोंदवला.

प्राचार्य डॉ. दीपक फुलारी यांच्या मार्गदर्शनाखाली महाविद्यालयाच्या सांस्कृतिक विभागाच्या वतीने या कार्यशाळेचे आयोजन करण्यात आले. पर्यावरणाला हानी पोहोचविणाऱ्या रासायनिक रंग व प्लास्टर ऑफ पॅरिसच्या मूर्तींऐवजी नैसर्गिक व पर्यावरणपूरक साहित्याचा वापर करून गणेशमूर्ती तयार करण्याचे प्रात्यक्षिक विद्यार्थ्यांना देण्यात आले.कार्यशाळेदरम्यान विद्यार्थ्यांनी स्वतः गणेशमूर्ती साकारत पर्यावरण संवर्धनाचा संदेश दिला. गणेशोत्सव हा केवळ धार्मिक उत्सव न राहता तो पर्यावरणपूरक आणि सामाजिक जाणीव निर्माण करणारा उत्सव व्हावा, यासाठी विद्यार्थ्यांना मार्गदर्शन करण्यात आले.या उपक्रमामुळे विद्यार्थ्यांमध्ये सर्जनशीलतेसोबतच पर्यावरण रक्षणाची जाणीव निर्माण होण्यास मदत झाली. कार्यशाळेला मिळालेला युवक-युवतींचा उत्स्फूर्त प्रतिसाद हा पर्यावरणपूरक गणेशोत्सवाबाबत वाढत असलेल्या सकारात्मक दृष्टिकोनाचे द्योतक ठरला.

---------------

हिंदुस्थान समाचार / Aparna Chitnis