नवी दिल्ली, 14 सप्टेंबर (हिं.स.) अभिषेक शर्माच्या शानदार अर्धशतकाच्या जोरावर भारताने पहिल्या टी-२० सामन्यात अफगाणिस्तानवर सात गडी राखून विजय मिळवला. प्रथम फलंदाजी करताना अफगाणिस्तानने २० षटकांत आठ गडी गमावून १५६ धावा केल्या. प्रत्युत्तरात भारताने १३.४ षटकांत तीन गडी गमावून १५७ धावा करत सामना जिंकला. या विजयामुळे भारताने तीन सामन्यांच्या मालिकेत १-० अशी आघाडी घेतली. दुसरा सामना १५ सप्टेंबर रोजी दिल्लीतील अरुण जेटली स्टेडियमवर खेळला जाईल.

धावांचा पाठलाग करताना भारताची सुरुवात खराब झाली आणि संजू सॅमसन लवकर बाद झाला. या सामन्यात वैभव सूर्यवंशीच्या जागी सॅमसनला संधी देण्यात आली होती, पण तो छाप पाडण्यात अपयशी ठरला. त्यानंतर अभिषेकने इशानसोबत सूत्रे हाती घेतली. या दोन फलंदाजांनी दुसऱ्या विकेटसाठी १२१ धावांची भागीदारी करत अर्धशतक झळकावले. अभिषेक शतकाच्या दिशेने वाटचाल करत असतानाच मोहम्मद नबीने त्याला बाद केले. त्यानंतर इशानने कर्णधार श्रेयस अय्यरसोबत डावाला पुढे नेले. दोन्ही फलंदाजांनी संघाला विजयाच्या उंबरठ्यावर आणले. नबीच्या गोलंदाजीवर एक जोरदार फटका मारला तेव्हा इशान अर्धशतकाच्या जवळ पोहोचला होता. मात्र, सीमारेषेवर रशीद खानने एक अप्रतिम झेल घेतला आणि त्यामुळे त्याचे अर्धशतक हुकले. त्यानंतर श्रेयस आणि तिलकने विजयाची औपचारिकता पूर्ण केली.

अभिषेकने भारतासाठी दमदार फलंदाजी करत अर्धशतक झळकावले. अभिषेकने इशान किशनसोबत भागीदारी केली. अभिषेकने सात चौकार आणि सात षटकारांच्या मदतीने ३२ चेंडूंमध्ये ८२ धावा केल्या. इशान किशननेही पाच चौकार आणि एका षटकाराच्या मदतीने ३३ चेंडूंमध्ये ४२ धावा केल्या. संजू सॅमसन १० धावांवर बाद झाला, तर कर्णधार श्रेयस अय्यर आठ धावांवर आणि तिलक वर्मा तीन धावांवर नाबाद राहिले. अफगाणिस्तानकडून मोहम्मद नबीने दोन बळी घेतले, तर अझमतुल्ला ओमरझाईने एक बळी घेतला.

---------------

हिंदुस्थान समाचार / वृषाली देशपांडे