नवी दिल्ली, 18 सप्टेंबर (हिं.स.)। देशात आयफोन १८ प्रो आणि प्रो मॅक्सची विक्री सुरू झाली आहे. दिल्ली, मुंबई आणि बेंगळुरू येथील ॲपल स्टोअरच्या बाहेर शुक्रवारी ग्राहकांच्या लांबच लांब रांगा पाहायला मिळाल्या. अनेक जण आपल्या आवडत्या आयफोन मॉडेलची सर्वप्रथम खरेदी करण्यासाठी रात्रीपासूनच रांगेत उभे असल्याचे दिसून आले.
दिल्लीसह देशातील इतर महानगरांमध्ये आयफोन १८ प्रो आणि प्रो मॅक्स विक्रीसाठी उपलब्ध होताच आज सकाळी साकेत येथील सेलेक्ट सिटीवॉक मॉलमधील ॲपल स्टोअरमध्ये ग्राहकांची मोठी गर्दी झाली. त्याचप्रमाणे उत्तर प्रदेशातील नोएडा येथील डीएलएफ मॉलमधील ॲपल स्टोअरमध्येही नवीन उपकरणे खरेदी करण्यासाठी मोठ्या संख्येने ग्राहक आले होते.
मुंबईतील जिओ वर्ल्ड ड्राइव्ह येथील स्टोअरच्या बाहेरही मोठी गर्दी झाली होती. तर बेंगळुरूमध्ये नव्याने लाँच झालेला आयफोन १८ प्रो आणि आयफोन १८ प्रो मॅक्स खरेदी करण्यासाठी ग्राहक ॲपल स्टोअरच्या बाहेर रांगेत उभे राहिले होते.
मुंबईतील एका ग्राहकाने सांगितले की, तो रात्री १० वाजल्यापासून रांगेत उभा आहे आणि त्याला सकाळी ८ वाजताचा पहिला स्लॉट मिळाला आहे. बेंगळुरूतील एका ग्राहकाने आयफोन लाँच होणे हा सणासारखा अनुभव असल्याचे सांगितले. त्याचप्रमाणे दिल्लीतील एका ग्राहकाने सांगितले, मी १८ प्रो मॅक्स १ टीबी घेण्यासाठी आलो आहे. मी त्याचे प्री-बुकिंग केले आहे. आता फक्त प्रतीक्षा करत आहे.
विशेष म्हणजे, ॲपलच्या आयफोन १८ प्रोची सुरुवातीची किंमत १ लाख ६४ हजार ९०० रुपये, तर आयफोन १८ प्रो मॅक्सची सुरुवातीची किंमत १ लाख ७९ हजार ९०० रुपये आहे. पहिल्यांदाच भारतात तयार करण्यात आलेले नवे प्रो मॉडेल पहिल्याच दिवसापासून चेन्नई युनिटमध्ये तयार करण्यात आले असून, येथूनच ते जागतिक बाजारपेठेत पाठवले जात आहेत.
---------------
हिंदुस्थान समाचार / Suraj Chaugule
