मुंबई, 25 सप्टेंबर, (हिं.स.)। यामी गौतम धर यांची मुख्य भूमिका असलेल्या 'नयी नवेली' या फँटसी फॅमिली एंटरटेनर चित्रपटाबद्दल प्रेक्षकांमध्ये मोठी उत्सुकता निर्माण झाली आहे. या चित्रपटातील 'भाभी तबाही' हे पहिले गाणे नुकतेच प्रदर्शित करण्यात आले आहे. लग्नाच्या उत्सवाच्या पार्श्वभूमीवर चित्रित झालेले हे गाणे, कुटुंबात नव्याने आलेल्या 'वहिनी'च्या (भाभीच्या) 'मुह-दिखाई' (मुखदर्शन) समारंभादरम्यान यामीच्या व्यक्तिरेखेची पहिली झलक सादर करते. या गाण्यात यामी कुटुंबात अतिशय उत्साहाने प्रवेश करताना दिसत आहे.

'भाभी तबाही' या गाण्याचे संगीत आणि निर्मिती जी.व्ही. प्रकाश कुमार यांनी केली आहे, तर याचे बोल वायू (Vayu) यांनी लिहिले आहेत आणि नीती मोहन यांनी आपला आवाज दिला आहे. या गाण्यात भांगडा, रॅप, शास्त्रीय संगीत आणि हिप-हॉप यांचा सुरेख संगम पाहायला मिळतो. चित्रपटाच्या टीझरमध्ये नवीन वहिनी ही कदाचित 'डायन' (चेटकीण) असू शकते, अशी गूढता निर्माण केली गेली होती; मात्र हे गाणे चित्रपटाची कथा एका हलक्या-फुलक्या आणि संगीतमय पद्धतीने पुढे नेते. या गाण्याचे नृत्यदिग्दर्शन विजय गांगुली यांनी केले आहे.

यामीसोबतच या चित्रपटात आदिनाथ एम. कोठारे, अनुराग ठाकूर, सुनीता राजवार, मीता वशिष्ठ, आदित्य कुलश्रेष्ठ, सुष्मिता मुखर्जी, सोनल झा आणि सुनील सिन्हा यांसारखे अनेक कलाकार महत्त्वपूर्ण भूमिकांमध्ये दिसणार आहेत. या चित्रपटाचे दिग्दर्शन बालाजी मोहन यांनी केले आहे, तर आनंद एल. राय आणि हिमांशू शर्मा हे निर्माते आहेत. चित्रपटाची कथा हिमांशू शर्मा आणि दिव्या निधी शर्मा यांनी लिहिली आहे. 'नयी नवेली' हा चित्रपट दसऱ्याच्या पार्श्वभूमीवर १६ ऑक्टोबर २०२६ रोजी देशभरातील चित्रपटगृहांमध्ये प्रदर्शित होणार आहे.

---------------

हिंदुस्थान समाचार / हर्षदा गावकर