नागोया (जपान), 27 सप्टेंबर, (हिं.स.)आशियाई क्रीडा स्पर्धांमध्ये भारताने ॲथलेटिक्समधील पदकांच्या संख्येत आणखी दोन पदकांची भर घातली. आयची-नागोया येथे झालेल्या स्पर्धांमध्ये सर्वेश कुशारेने पुरुषांच्या उंच उडीमध्ये रौप्यपदक जिंकले, तर पारुल चौधरीने महिलांच्या ३००० मीटर स्टीपलचेसमध्ये कांस्यपदक पटकावले. कुशारेने २.२५ मीटरची उंची पार करत पुरुषांच्या हाय जंपच्या अंतिम फेरीत दुसरे स्थान मिळवले. चायनीज तैपेईच्या फू चाओ-हसुआननेही २.२५ मीटरची उंची पार केली, परंतु त्याने सुवर्णपदक जिंकले.तर दक्षिण कोरियाच्या वू सांग-ह्योकने २.२२ मीटरच्या सर्वोत्तम कामगिरीसह कांस्यपदक मिळवले.

महिलांच्या ३००० मीटर स्टीपलचेसमध्ये, पारुलने ९:०८.६७ अशी स्वतःची सर्वोत्तम कामगिरी (पर्सनल-बेस्ट) नोंदवत कांस्यपदक जिंकले. बहरीनच्या विनफ्रेड यावीने ९:०४.३६ वेळेसह सुवर्णपदक जिंकले, तर कझाकस्तानच्या नोराह जेरुतो तानुईने ९:०६.८२ वेळेसह रौप्यपदक मिळवले.

महिलांच्या लांब उडीच्या अंतिम फेरीत भारताच्या अँसी सोजनने ६.५३ मीटरच्या सर्वोत्तम कामगिरीसह रौप्यपदक जिंकले. सोजनचे अवघ्या दोन सेंटीमीटरने सुवर्णपदक हुकले. चीनच्या हुआंग यिंगयिंगने ६.५५ मीटरच्या उडीसह अव्वल स्थान पटकावले. चीनच्याच टॅन मेंगयीने ६.४६ मीटरसह कांस्यपदक जिंकले, तर भारताच्या शैली सिंगने ६.४२ मीटरच्या सर्वोत्तम कामगिरीसह चौथे स्थान पटकावले.

भारताच्या तेजस्विन शंकरने आशियाई खेळांमधील डेकॅथलॉन प्रकारात ७,९३४ गुणांची प्रभावी कामगिरी करत कांस्यपदक जिंकले. जपानच्या युमा मारुयामाने ८,१२३ गुणांसह सुवर्णपदक जिंकले, तर चीनच्या चेन झिंगहुआने ८,०१२ गुणांसह रौप्यपदक पटकावले. शंकर मागील आशियाई क्रीडा स्पर्धेत जिंकलेले रौप्यपदक पुन्हा मिळवण्याच्या अगदी जवळ पोहोचला होता, परंतु दमदार कामगिरी करूनही त्याला अखेरीस कांस्यपदकावर समाधान मानावे लागले. त्याची एकूण ७,९३४ गुणांची कामगिरी ही मागील आशियाई क्रीडा स्पर्धेतील त्याच्या कामगिरीपेक्षा सरस ठरली.या भारतीय खेळाडूने या वर्षाच्या सुरुवातीलाच ८,००० गुणांचा टप्पा ओलांडला होता आणि आशियाई क्रीडा स्पर्धेतील डेकॅथलॉन प्रकारात तो पुन्हा एकदा या टप्प्यापर्यंत पोहोचण्याच्या अगदी जवळ आला होता.

---------------

हिंदुस्थान समाचार / वृषाली देशपांडे