नाशिक, 11 ऑक्टोबर (हिं.स.)।

: सातपूर गोळीबार प्रकरणी पोलिसांनी रिपाइंचे ज्येष्ठ नेते, जिल्हाध्यक्ष प्रकाश लोंढेसह पुत्र दीपक लोंढे या दोघांना अटक केली आहे. संशयित भूषण लोंढे अद्याप फरार असून पोलीस त्याचा शोध घेत आहे. दरम्यान लोंढेचा आणखी एक कारनामा समोर आला असून त्यांनी सातपूर शिवारातील कांबळेवाडी येथील आयटीआय पुलाजवळील नंदिनी नदीच्या पात्रालगत बेकायदेशीरपणे बांधकाम केल्याचे समोर आले आहे.

याप्रकरणी नगर नियोजन विभागाने नोटीस बजावत पाच दिवसांच्या आत पालिकेला समाधानकारक उत्तर न मिळाल्यास लोंढे पितापुत्रांवर गुन्हा दाखल करून या बांधकाम जमिनदोस्त केले जाईल व पाडकामाचा खर्च तुमच्याकडून वसूल केला जाईल, असे लोंढे यांना दिलेल्या नोटीसात म्हटले आहे. नाशिक महानगरपालिकेच्या पथकाने काल या बांधकामाची पाहणी केली. दरम्यान मनपा प्रशासनाकडून हे बेकायदेशीर बांधकाम जमिनदोस्त केले जाण्याची शक्यता आहे. मनपाने दिलेल्या नोटिसात म्हटले की, वरील आदेशाची पूर्तता न केल्यास ह्या आदेशाची पूर्तता तुमच्या जबाबदारीवर आणि खर्चाने

नाशिक महानगरपालिकेच्या वतीने करण्यात येईल व बांधकामाचे साहित्य व मशिनरी जप्त करण्यात येईल. लोंढे यांनी सुमारे २५ मी. १० मी. मापाचा तळ मजला व पहिला मजला असे पक्के बांधकाम व त्यावर होर्डिंग असे नंदीनी नदीच्या निळ्या पूररेषेच्या आत अनधिकृत बांधकाम आढळून आलेले आहे. या कामाकरीता महाराष्ट्र प्रादेशिक व नगररचना अधिनियम अन्वये आवश्यक असणारी परवानगी नाशिक महानगरपालिकेकडून घेतलेली नाही. या नोटीस मिळाल्यानंतर करण्यात असलेले अनधिकृत बांधकाम ताबडतोब बंद करण्यात यावे. बांधकाम विनापरवाना असल्याने यामुळे सार्वजनिक हितास व व्यक्तीगत हितास बाधा होण्याची शक्यता नाकारता येत नाही. तसेच कायद्याचा अनादर करून सार्वजनिक हितास व्यक्तीगत हितास बाधा आणल्याने आर्थिक हानीबरोबरच जीवितहानी होऊ शकते.

या बांधकामामुळे दुसऱ्यांच्या जिवितास धोका पोहोचविल्याबद्दल शिक्षा विहित केल्या आहेत. या अनधिकृत बांधकामामुळे त्याचा वापर करणाऱ्या व्याक्तीसंदर्भात बांधकाम, विकसन करणाऱ्यास या तरतुदी लागू होऊ शकतात. असे पालिकेने नोटिसात म्हटले आहे.

---------------

हिंदुस्थान समाचार / GOSAVI CHANDRASHEKHAR SUKDEV