दिवाळी निमित्त मालमत्ताधारकांना मनपाची भेट

लातूर, 15 ऑक्टोबर (हिं.स.)। लातूर येथील दिवाळी निमित्त मालमत्ताधारकांना मनपाची भेट मिळाली आहे मालमत्ता कर ८० % शास्ती माफी योजनेत अधिकाधिक थकबाकीदारांनी सुवर्णसंधीचा लाभ घेऊन थकीत मालमत्ता कर भरणा करावा - आयुक्त तथा प्रशासक श्रीमती मानसी यांनी आवाहन केले आहे

कर संकलन व कर आकारणी विभाग लातूर शहर महानगरपालिका यांच्या वतीने सन २०२५-२६ या आर्थिक वर्षाच्या सुरूवातीपासूनच १००% मालमत्ता कर वसुलीचे उद्दिष्ट ठेवून मालमत्ताधारकासाठी विविध उपक्रम राबविण्यात येत आहेत. त्यानुसार चालू वर्षातील मालमत्ताधारकासाठी सूट व थकबाकीधारकासाठी शास्ती माफी योजना वेळोवेळी लागू करण्यात आली होती. त्या अंतर्गत विविध प्रकारचे सूट व १००% शास्ती माफी योजना ही लागू करण्यात आली होती. परंतु वारंवार प्रशासनामार्फत आवाहन करूनही व सूट लागू करूनही काही मालमत्ताधारक प्रतिसाद देत नसल्याने सुरू केलेली जप्ती ची धडक मोहीम देखील सुरूच राहणार आहे . परंतु तत्पूर्वी थकबाकीदार मालमत्ताधारकांना दिवाळी निमित्त शेवटची संधी देण्याच्या दृष्टीने पुन्हा एकदा ८०% शास्ती माफीची योजना लागू करुन थकबाकीदारांना टॅक्स भरणा करण्याची संधी देण्याच्या निर्णय आयुक्त तथा प्रशासक श्रीमती मानसी यांनी घेतला आहे . तेव्हा सर्व मालमत्ता धारकांना कळविण्यात येते की, दिवाळी निमित्त लागू केलेल्या योजने अंतर्गत दि. १५ ऑक्टोबर ते १० नोव्हेंबर या कालावधीत आपल्याकडील थकीत कर एकरकमी भरल्यास आकारण्यात आलेल्या व्याज/शास्ती मध्ये ८० टक्के सूट देण्यात आली आहे.

ही शेवटची संधी असून यानंतर पुन्हा ही योजना लागू होणार नसल्याचे निर्णय घेण्यात आला आहे तरी अधिकाधिक थकबाकीदारांनी सुवर्णसंधीचा लाभ घेऊन टॅक्स भरणा करावा.तरी या योजनेचा सर्व थकबाकीदार मालमत्ताधारकांनी लाभ घेवुन आपल्याकडील देय कराचा भरणा करून महानगरपालिकेस सहकार्य करावे व जप्ती सारखी कटू कार्यवाही टाळावी असे आवाहन आयुक्त तथा प्रशासक श्रीमती मानसी यांनी केले आहे.

---------------

हिंदुस्थान समाचार / Mahesh Madanrao Chitnis