जळगाव, 21 ऑक्टोबर, (हिं.स.) - धरणगाव चौफुलीजवळ एका अज्ञात वाहनाने दुचाकीला जोरदार धडक दिल्याने झालेल्या अपघातात २५ वर्षीय तरुणाचा मृत्यू झाला. सूरज शामदास ठाकरे (सबगव्हाण खु, ता. पारोळा) असे मृत तरुणाचे नाव आहे. ही घटना सोमवारी मध्यरात्री घडली. सूरज हा दुचाकी (एमएच५४/डी६३४७) ने जात असताना महामार्गावरील धरणगाव चौफुलीजवळ त्याच्या दुचाकीला अज्ञात वाहनाने धडक दिली. त्यात त्याच्या डोक्यास गंभीर दुखापत होऊन तो जखमी झाला. त्यास पारोळा कुटीर रुग्णालयात दाखल केले असता डॉक्टरांनी तपासून मृत घोषित केले. अज्ञात वाहनचालक हा वाहन घेऊन पसार झाला आहे. याबाबत रोहिदास ठाकरे यांच्या फिर्यादीवरून गुन्हा दाखल करण्यात आला आहे.

म्हसावद-नांद्रा रस्त्यावर दोन दुचाकींच्या धडकेत एकाचा जळगाव येथे खासगी रुग्णालयात मृत्यू होऊन तीन तरुण जखमी झाले आहेत. ऋषिकेश पाटील (१६, नगरदेवळा) असे मयत युवकाचे नाव आहे. कुरंगी शिवारात माहिजीकडून पाचोराकडे जात असलेल्या दुचाकीवर पाचोरा येथील दोन तरुण घराकडे जात होते. सामनेर येथून दोन तरुण कासोदा येथे मामाच्या गावाला जात असताना दुचाकींचा अपघात झाला.

---------------

हिंदुस्थान समाचार / मनोहर कांडेकर