नंदुरबार, 3 ऑक्टोबर (हिं.स.) मौजे काथर्दे दिगर, ता. शहादा, येथील ग्रामपंचायतीच्या लोकनियुक्त सरपंच शेमळे कमाबाई दिलीप यांच्या विरुद्ध दाखल झालेल्या अविश्वास प्रस्तावाची पडताळणीसाठी 6 ऑक्टोंबर, 2025 रोजी विशेष ग्रामसभेचे आयोजन करण्यात आले असल्याचे, सहाय्यक जिल्हाधिकारी तथा उपविभागीय अधिकारी कृष्ण कांत कनवारीया यांनी कळविले आहे.

सरपंच श्रीमती शेमळे कमाबाई दिलीप यांच्या विरोधात दाखल झालेला अविश्वास प्रस्ताव दिनांक 23 सप्टेंबर, 2025 रोजी तीन-चतुर्थांशमताने संमत झाला आहे. आता या ठरावास ग्रामस्थांकडून अनुसमर्थन मिळवण्यासाठी विशेष ग्रामसभा आयोजित करण्यात आली आहे. ग्रामसभेतील कामकाज आणि मतदानाची प्रक्रिया विशेष ग्रामसभेत पुढीलप्रमाणे कामकाज करण्यात येणार आहे:  गणपूर्ती आवश्यक: विशेष ग्रामसभा घेण्यासाठी प्रचलित नियमांनुसार सभेची गणपूर्ती आवश्यक आहे.

अविश्वास ठरावास अनुसमर्थन: सभेच्या दिवशी, अविश्वास ठराव संमत करणेकामी शिरगणना करण्याच्या पद्धतीने साध्या बहुमताने त्यास अनुसमर्थन देण्यात येईल. मतदार यादी: मतदानासाठी दिनांक 01/10/2024 या अर्हता दिनांकावर आधारित, दिनांक 29/10/2024 रोजी प्रसिद्ध करण्यात आलेली विधानसभेची मतदार यादी ग्राह्य धरण्यात येणार आहे. त्यानुसार ग्रामस्थांचा सहभाग नोंदवला जाईल.

इतर विषयांवर चर्चा नाही: विशेष ग्रामसभेचे आयोजन केवळ अविश्वास ठरावावर चर्चा घेण्यासाठी केले असल्याने, या दिवशी इतर विषयांवर कोणतीही चर्चा होणार नाही.

ठराव मंजूर झाल्यास: विशेष ग्रामसभेत उपस्थित राहून शिरगणना पद्धतीने मतदान केलेल्या ग्रामसभा सदस्यांच्या साध्या बहुमताने अविश्वास ठराव मंजूर झाला, तर तो संमत झाला असे समजले जाईल.

ठराव फेटाळल्यास: विशेष ग्रामसभेत उपस्थित उपस्थित राहून मतदान केलेल्या सदस्यांच्या साध्या बहुमताने अविश्वास ठराव फेटाळला असेल तर, सरपंच पद कायम राहील. विशेष ग्रामसभा 06 ऑक्टोबर, 2025 रोजी सकाळी ठीक 11.00 वाजता जिल्हा परिषद मराठी शाळा, काथर्दे दिगर, ता. शहादा, जि. नंदुरबार येथे आयोजित करण्यात आली आहे. विशेष ग्रामसभेमध्ये येताना ग्रामपंचायतीच्या मतदारांनी सोबत राज्य निवडणूक आयोगाने विहित केलेला कोणताही ओळखीचा पुरावा बाळगणे आवश्यक आहे, असेही सहाय्यक जिल्हाधिकारी तथा उपविभागीय अधिकारी कृष्ण कांत कनवारीया यांनी कळविले आहे.

---------------

हिंदुस्थान समाचार / मनोहर कांडेकर